Хитойда сунъий интеллектдан фойдаланиш кундалик ҳаётнинг оддий қисмига айланиб бормоқда. Энди банклар, мобил операторлар, кафе ва бошқа компаниялар мижозларни жалб қилиш учун пулли бонус ёки бепул Wi-Fi ўрнига сунъий интеллект токенларини таклиф қилмоқда.

AI токен — сунъий интеллект модели матн, код ёки бошқа маълумотларни қайта ишлашда фойдаланадиган ҳисоб бирлиги.

Хитойда бу тушунча энди фақат дастурчиларга хос технологиявий атама бўлиб қолмаяпти, балки истеъмолчилар учун ҳам алоҳида хизмат ва бонусга айланмоқда. Мобил операторлар AI токенларни оддий интернет трафиги каби пакетларга ажратиб, сотишни бошлади. Масалан, China Telecom ойига 9,9 юандан 10 миллион токенлик тарифни таклиф қилмоқда. Компаниянинг юқори тарифларида эса 80 миллион токенгача ажратилади. China Mobile ва China Unicom ҳам токен асосидаги хизматларни йўлга қўйган. Айрим тарифларда фойдаланувчилар бир нечта сунъий интеллект моделларидан ягона ҳисоб орқали фойдаланиши мумкин.

Энг қизиқ тенденция эса оддий савдо нуқталарида кузатилмоқда. Rest of World маълумотларига кўра, Пекиндаги айрим кафе ва ресторанлар мижозларга ичимлик ёки таом билан бирга AI токенларини тақдим этмоқда. Масалан, Jingu Yuan ресторани овқатдан сўнг мижозларга сунъий интеллект ҳисоблаш қувватидан фойдаланиш учун ваучер бермоқда. Банклар ҳам бу тенденциядан четда қолмаяпти. Айрим кредит карталарида харидлар учун анъанавий бонуслар ўрнига сунъий интеллект хизматларидан фойдаланиш имконини берувчи токенлар таклиф қилинмоқда.

Шунақа гаплар, Хитойда сунъий интеллект аста-секин алоҳида рақамли хизматдан истеъмол бирлигига айланмоқда. Агар бу тенденция кенгайса, келажакда мобил интернет учун мегабайт қандай одатий тушунчага айланган бўлса, AI токенлар ҳам рақамли хизматлар бозорида шундай кундалик валютага айланиши мумкин.