Грузиянинг собиқ бош вазири Иракли Гарибашвили пул ювишда айбланиб, беш йилга озодликдан маҳрум қилинди. 

Грузия Бош прокуратураси маълумотларига кўра, Гарибашвили билан айбни тан олиш бўйича келишувга эришилган, унга кўра у беш йилга озодликдан маҳрум қилинган ва 1 миллион лари (370 000 доллар) миқдорида жаримага тортилган. 

«Иракли Гарибашвили айбини тан олади ва келишув шартларига рози», деб хабар берди прокуратура Facebookʼдаги постида.  

Октябр ойида Гарибашвили Грузия Жиноят кодексининг 194-моддаси бўйича, катта миқдордаги даромад олиш билан боғлиқ пул ювишда айбланган. 

Айблов хулосасига кўра, 2019 йилдан 2024 йилгача Грузия мудофаа вазири ва бош вазири лавозимларида ишлаган Гарибашвили расмий маошидан ташқари бирон бир тадбиркорлик фаолияти билан шуғулланиш ёки бошқа бирон бир ҳақ олишдан маҳрум қилинган. 

Гарибашвили миллиардер ва «Грузия орзуси» партияси асосчиси Бидзина Иванишвилининг энг яқин ишончли вакилларидан бири ҳисобланган. Ўтган йилнинг апрель ойида Гарибашвили сиёсатдан кетишини эълон қилди ва фаолиятини якунлади.