Reuters агентлиги маҳаллий Соғлиқни сақлаш бошқармасига таяниб хабар беришича, Исроилнинг Ғазо секторидаги ҳаво ҳужумларида ўн саккиз киши ҳалок бўлди. Бу сўнгги ҳафталар ичидаги энг юқори бир кунлик ўлим кўрсаткичи бўлди. 

Ҳарбий самолётлар Ғазо, Дейр ал-Балаҳ ва Хон Юнис шаҳарларига зарба берди. Соғлиқни сақлаш бошқармасининг маълумотларига кўра, турар-жой бинолари ва кўчирилганлар учун чодир лагерлари зарар кўрган. 

Исроил армияси Дейр ал-Балаҳдаги зарбалар ҲАМАСнинг Нуҳба махсус кучлари бўлинмасининг икки қўмондонини нишонга олганини айтди. Бошқа ҳудудларда эса зарбалар «ҳарбий операциячилар»ни нишонга олди. 

Янги зарбалар тўлқини АҚШ президенти Доналд Трампнинг ҲАМАС қуролсизланишга тайёр эканлиги ҳақидаги эълонидан кейин бошланди. Исроил ҳукумати бу истиқболга шубҳа билан қаради: Энергетика вазири Эли Коэн ҳужумларни тўхтатиш бўйича келишувга эришилмаганини айтди. Унинг қўшимча қилишича, ҲАМАСни тўлиқ йўқ қилиш ва қуролсизлантириш Исроилнинг асосий талаби бўлиб қолмоқда. Бунга жавобан ҳаракат вакиллари Исроилни тинчлик жараёнини бузишга ва ўз шартларини юклашга уринишда айбладилар.