Дунё бўйлаб футбол мухлислари 2026 йилда ўтадиган жаҳон чемпионати чипталари қимматлиги сабаб ФИФАни “мисли кўрилмаган хиёнат”да айбламоқда. ФИФАдан чипта сотиш сиёсатини қайта кўриб чиқиш талаб қилинмоқда.

Футбол бўйича глобал бошқарув идораси саналган ФИФА чипталарнинг 8 фоизини энг садоқатли мухлисларига сотиши учун миллий ассоциацияларга ажратади. Масалан, Германия футбол федерацияси чоп этган рўйхатга кўра, гуруҳ ўйинлари учун чипта нархи 180 доллардан 700 долларга қадар белгиланган. Финал учрашувини бевосита стадионда кузатиш имконияти эса 4185 доллардан 8680 долларга қадар баҳоланган.

Жаҳон бўйлаб мухлисларни дарғазаб этаётган жиҳат шундаки, айни пайтда эълон қилинган нархлар ФИФАнинг аввалги баёнотларидан фарқ қилади. ФИФА ўз вақтида чипталар 60 доллар атрофида бўлишига ваъда берган. Етти йил олдин АҚШ нуфузли турнирга мезбонлик учун ариза берганида эса дастлабки босқичларда минглаб ўринларни 21 доллардан сотишга ҳаракат қилишини айтган эди.

Шунга кўра, Football Supporters Europe (FSE) ташкилоти чипталар нархи бу қадар қиммат белгиланганини товламачилик деб атаган.

“Бу – жаҳон чемпионатлари анъаналарига мисли кўрилмаган хиёнат ва ушбу томошага мухлисларнинг ҳиссасини очиқ инкор этишдир”, – дейилади ташкилот баёнотида.

Футбол федерациялари ФИФАдан “жаҳон чемпионатларининг анъаналари,  универсаллиги ва маданий аҳамиятига ҳурмат” тиклангунга қадар миллий ассоциациялар орқали чипта сотишни тўхтатиб туришни сўрамоқда.

11 декабрь куни ФИФА чипта савдосининг учинчи босқичини бошлади. Эндиликда мухлислар муайян ўйинга чипта учун ариза топшириши мумкин.

Аризачилар чипта олиши кафолатланмаган, чунки чипта эгалари тасодифий танлов тамойили асосида аниқланади. Қуръа жараёни 2026 йил 13 январь куни якунланади. Аризаси маъқулланган номзодлар февраль ойида электрон почта орқали билдирги олади. Шундан кейин чипта учун тўлов қабул қилинади.

Футбол бўйича 23-жаҳон чемпионати 2026 йилнинг июнь-июль ойларида АҚШ, Канада ва Мексикада ўтказилиши режалаштирилган.

ФИФА президенти Жанни Инфантино уни тарихдаги энг буюк жаҳон чемпионати бўлиши, мундиални стадионларда 7 миллион, телевизорда эса 6 миллиард киши томоша қилишини айтган эди.

Ноябрь ойида АҚШ давлат департаменти жаҳон чемпионатига чипта харид қилган мухлисларга виза суҳбати учун навбатда устуворлик берилиши, аммо чипта виза олишни кафолатламаслигини маълум қилганди.

Хабарингиз бор, Ўзбекистон терма жамоаси ЖЧнинг “K” гуруҳидан ўрин олган. Юртдошларимиз гуруҳ ўйинларида Португалия, Колумбия ва қитъалараро плей-офф ғолиби (Конго ДР / Ямайка / Янги Каледония) билан беллашади.ога изоҳ:

ФИФА президенти Жанни Инфантино ЖЧ ўйинлари жадвалини эълон қилиш маросимида. Вашингтон, 2026 йил 6 декабрь. Фото: AP