АҚШ президенти Дональд Трамп маъмурияти Украина бўйича Москва билан музокараларда «ҳудуддаги реал вазият»дан келиб чиқмоқда. Россия ташқи ишлар вазири Сергей Лавровнинг айтишича, бу, Россия томонининг ижобий муносабати ва мулоқотни давом эттиришга тайёрлигини оширяпти.

Лавров АҚШ томони, жумладан, Украинанинг НАТОга аъзо бўлмаслигини ҳамда ҳудудий масалаларда амалдаги вазиятни ҳисобга олиш заруратини тан олаётганини айтди. У Қрим, Донецк, Луганск, Запорожье ва Херсон бўйича Россия позициясини ҳам шу нуқтаи назардан изоҳлади.

Россия ТИВ раҳбари Москвада Владимир Путиннинг АҚШ вакиллари Стив Уиткофф ва Жаред Кушнер билан ўтказган музокаралари ҳам Трампнинг Украина бўйича шу ёндашувига таянганини таъкидлади.

Кремл матбуот котиби Дмитрий Песков эса америкалик вакиллар Москва ва Киев ўртасида қатнаб, икки томон позицияларини етказаётганини билдирди. У Россия Украина ва АҚШ иштирокидаги уч томонлама музокаралар қайта бошланишидан умидвор эканини айтди.

Песковнинг сўзларига кўра, Москва бир томондан ҳарбий мақсадларига эришишга яқин эканига ишонади, иккинчи томондан эса исталган вақтда тинч йўл билан келишувга ўтишга тайёр.

Шу билан бирга, Лавров Қора денгиз ғалла ташаббусини қайта тиклаш ғоясини «мутлақо қабул қилиб бўлмайдиган ва реал бўлмаган» деб атади. Унинг таъкидлашича, Россия 2023 йилда келишувдан чиқишига Москвага берилган ваъдалар бажарилмагани сабаб бўлган.

Эслатиб ўтамиз, Уиткофф ва Кушнер 5–6 сентябр кунлари аввал Москвага, сўнг Киевга ташриф буюрди. Мазкур ташрифлар Украинадаги урушни тугатиш бўйича музокараларни жонлантиришга қаратилган.