Ўзбекистон Республикаси Фанлар Академияси академиги, профессор Қаҳрамон Даврановга Хитой Халқ Республикасининг Шандун қишлоқ хўжалиги ва муҳандислиги университетининг фахрий профессори унвони берилди.

Қ.Давранов микробиология ва биотехнология фанларининг ривожланишига катта ҳисса қўшган, унинг 350 дан ортиқ илмий мақолалари чоп этилган. Улардан 150 дан ортиғи хорижий мамлакатларнинг нуфузли, юқори импакт факторга эга бўлган илмий журналларида нашр қилинган. Илмий кашфиётлари учун 35 дан ортиқ муаллифлик гувоҳномалари ва патентлар олган, улардан биттаси Россия Федерациясининг халқаро патенти (№2835165), яна биттаси Евроосиё патенти (№021467) бўлиб, тупроқ унумдорлигини ошириш ва ўсимликларни касалликлардан ҳимоя қилишга қаратилган. Унинг мақолаларидан 950 дан ортиқ ҳорижлик олимлар ўз мақолаларида фойдаланганлар.

К.Давранов шу пайтгача 12 нафар фан докторларига (5 нафари микробиология ва вирусология, 4 нафари биотехнология, 1 нафари ўсимликлар физиологияси ва биокимёси, 1 нафари биокимё ҳамда 1 нафари техника фанлари) ва 21 нафар фан номзодларига (улардан 8 нафари биотехнология, 7 нафари микробиология ва 5 нафари биокимё ҳамда 1 нафара ўсимликлар физиологияси ва биокимёси) илмий раҳбарлик қилган.

К.Давранов – микроорганизмлар асосида янги биотехнологиялар яратишнинг илмий асосларини ишлаб чиқиш ва амалиётга татбиқ этиш бўйича ўз мактабини яратган йирик олим.

К.Давранов дунёдаги бир қатор нуфузли илмий-тадқиқот институтлари билан ҳамкорлик қилиб келмоқда. Хусусан, Канада Миллий академиясининг Биотехнология институти, Хайфадаги ТЕХНИОН институти (Исроил), АҚШдаги Биохимия институти (Филадельфия штати), Россия Фанлар академиясининг Микробиология институти, Россия Фанлар академиясининг Биотехнология федерал маркази, Микроорганизмлар биокимиёси ва физиологияси институти, Россия медбиосаноати, Озиқ-овқат биотехнологияси институти, Беларусь Фанлар академиясининг Микробиология институти, Украина Фанлар академияси Микробиология ва вирусология институти ҳамда «Энзим» илмий ишлаб чиқариш бирлашмаси; Грузия Республикаси Фанлар академиясининг Ўсимликлар физиологияси ва биокимёси институти, Ломоносов номидаги Москва Давлат университети, Чехия Фанлар академиясининг Биология ва органик кимё институти, Прагадаги Микробиология институти, Ўзбекистон Республикаси Фанлар Академиясининг Ўсимлик моддалари кимёси институти, Биоорганик кимё институти, “Геномика ва биоинформатика” маркази билан илмий ҳамкорлик олиб бормоқда.

Илмий ва илмий ташкилотчилик ишлар билан бир қаторда К.Давранов катта педагогик фаолият ҳам олиб бормоқда. У, дастлаб, ўриндошлик асосида Тошкент давлат аграр университетида профессор (1987-2000), “Биотехнология” кафедрасининг мудири (2000-2003), 2008 йилдан ҳозиргача Мирзо Улузбек номидаги Миллий универститетнинг Биология факультети, “Микробиология ва биотехнология” кафедраси профессори лавозимида фаолият кўрсатиб келмоқда.

У энг замонавий фанлардан бўлган “Саноат микробиологияси”, “Нанобиотехнология” , “Микроорганизмлар биотехнологияси”, “Биологик фаол ва доривор моддалар биотехнологияси” ва бошқа соҳаларнинг фундаментал устаси, ташкилотчи, кенг миқёсли фикр юритувчи, меҳнатсевар педагог олим.

Академик К.Даврановнинг “Микроблар дунёси” (2002, 2023 йилда 2-нашри), “Биотехнология: илмий, амалий ва услубий асослари” (2008), “Bacillus thuringiensis бактериясининг қишлоқ хўжалигидаги аҳамияти” (2017), “Теоретические и практические основы выщелачивания благородных металлов” (2021), “Экология микроорганизмов” (2022),”Экологическая биотехнология”(2019) номли монографиялари ҳамда Ўзбекистон Республикаси Олий ва ўрта махсус таълим Вазирлиги буюртмалари асосида тайёрланган “Озиқ-овқат ва озуқа маҳсулотлари биотехнологияси” (2017), “Микробиология ва биотехнология асослари” (2013), “Биологик фаол ва доривор моддалар биотехнологияси” (2018), “Саноат микробиологияси” (2013), “Умумий ва техник микробиология” (2005), “Нанобиотехнология асослари” (2021), Педагогические технологии в преподавании клеточной и генной инженерии (2021), “Биотехнология асослари” (2017), “Клеточная и генная инженерия” (2022), “Биотехнология” (2022), Вирусология (2023), Микробиология (2023), Нанобиотехнология (2025) номли дарслик ва ўқув қўлланмалари нашр этилган.