Бухоро вилоят Архив тизимида ишлаб келган аёлнинг фирибгарлик ва ҳужжатни сохталаштириш билан боғлиқ жиноят фош этилди.

Жиноят ишлари бўйича Қоракўл тумани Суди қарорига кўра, у пенсия чиқариб бериш ваъдаси билан ўз қариндоши бўлган фуқародан пул олган ва сохта архив маълумотномасини  тайёрлаган.

1987 йилда Олот туманида туғилган Э.А. бир вақтлар Олот тумани идоралараро шахсий таркиб архивида фонд сақловчи вазифасида ишлаган. Кейинчалик ишдан чиқиб, уйда ўтирган бўлган.

Тергов материалларига кўра, Э.А.  2023 йилда ўз хизмат мавқеидан фойдаланиб, «Денов» маҳалласида яшовчи С.Қ.ни алдаган. Унга пенсияга чиқиш учун иш стажи етарли эмаслигини билиб, танишлари орқали бу масалани ҳал қилиб беришини айтган. Унинг сўзларига кўра, пенсияни расмийлаштириш учун архив ҳужжатлари орқали қўшимча иш стажи «ёздириб бериш» мумкин эди.

Бунинг учун эса 300 АҚШ доллари талаб қилган. С.Қ. бунча миқдордаги пули бўлмагани учун қўшнисидан қарз олган ва шу куниёқ, Э.А.га 300 АҚШ доллари топширган.

Э.А. тайёрлаган маълумотнома электрон база орқали Давлат хизматлари марказига юборилган ва унинг асосида С.Қ.га шу асосда ёшга доир пенсия тайинланган. У бир неча ой давомида пенсия олиб келган.

Орадан вақт ўтиб, пенсия ҳужжатлари қайта текширилганда, архив маълумотлари билан солиштириш орқали жиддий фарқлар аниқланган. 2025 йилнинг охирида ҳолат юзасидан тергов ишлари бошланиб кетган. Тергов ҳужжатларига кўра, Э.А. архивда сақланаётган «Денов колхози иш ҳақи китоблари» асосида С.Қ.нинг иш кунларини сунъий равишда кўпайтирган. Натижада, аслида, 5 йил 9 ой иш стажи бўлган фуқарога 7 йил 10 ой стаж борлиги ҳақида сохта архив маълумотномаси тайёрлангани ошкор бўлган.

Текшириш натижасида С.Қ.нинг 1984 йилдаги иш кунлари асоссиз кўпайтирилгани, 1985 йилдаги иш кунлари бошқа фуқарога тегишли бўлгани ҳамда айрим йиллардаги иш кунлари сунъий равишда қўшиб ёзилгани аниқланган. Ва шу сабаб билан С.Қ.нинг пенсияси бекор қилинган ва у олган 5 миллион 789 минг 863 сўм пуллар давлатга қайтарилиши белгиланган.

С.Қ. ҳуқуқни муҳофаза қилувчи органларга ўз яқин қаришдоши томонидан 2023 йилда пенсия ҳужжатлари сохталаштириб берилганини ва у ишонганини айтиб, мурожаат қилган. Шундан сўнг, департамент ходимлари томонидан тезкор тадбир ташкил этилган. Э.А. ўз қариндоши С.Қ.дан олган пулларини қайтариш учун жабрланувчи билан учрашган ва 200 АҚШ долларини қайтараётган вақтда тезкор ходимлар томонидан ушланган.

Жиноят ишлари бўйича Қоракўл туман суди айбдорга Жиноят кодексининг 168-моддаси (Фирибгарлик), 28- (Жиноят иштирокчиларининг турлари) ҳамда 211- ( Пора бериш) моддалари билан иш қўзғаб, 3 йил муддатга озодликни чеклаш ҳамда 2 йил муддатга ахлоқ тузатиш ишлари жазосини берган.