Португалия терма жамоаси ва Саудия Арабистонининг «Ан-Наср» клуби ҳужумчиси Криштиану Роналду британиялик футбол агенти ҳақидаги сериалда суратга тушиши мумкин. Бу ҳақда The Sun нашри хабар берди.

Маълум қилинишича, лойиҳа «Kingsman» филми режиссёри Мэттю Вон билан ҳамкорликда амалга оширилмоқда. Сериалда актёр Дэмиан Люис ҳамда бир қатор таниқли спортчилар иштирок этади.

Манбага кўра, сериал футбол агенти Даррен Дейннинг ғояси асосида яратилган. Лондонда суратга олиш ишлари бошланган. «Day 1s» номли лойиҳа Стэнли Далтон исмли футбол агенти ҳаётини ҳикоя қилади.

Сериалда, шунингдек, Франция футболи афсонаси Терри Анри ва британиялик репер Дейв ҳам роль ижро этиши кутилмоқда. Лойиҳа Бразилиянинг «Globo» телеканали суратга олган «The Playoffs» сериали билан таққосланмоқда.

Криштиану Роналду ушбу лойиҳада нафақат актёр, балки ижрочи продюсер сифатида ҳам иштирок этади. «Day 1s» Роналду ва Мэттю Вон ҳамкорлигида ташкил этилган «URMarv Studios» студиясининг илк лойиҳаси бўлади.