Қарийб 150 йил аввал 50 миллиондан зиёд инсоннинг ҳаётига зомин бўлган «Эл-Ниньо» бу йил такрорланиши мумкин. Гавайи университети ва Жаҳон метеорология ташкилоти тадқиқотчилари шундай хулосага келишди.

«Эл-Ниньо» — Тинч океанининг тропик зонаси шарқий-марказий қисми сувларининг ҳар бир неча йилда кузатиладиган исиши ҳодисасидир. 2026 йилда у ерда океан ҳарорати ўртача кўрсаткичдан 3 даражага юқорилаши ва рекордларни янгилаши мумкин.

The Washington Post эслатишича, деярли 150 йил аввал юз берган «Эл-Ниньо» жуда катта иқлимий ўзгаришларга сабаб бўлиб, қишлоқ хўжалиги экинларига қирон келтирган. Кутилаётган ҳодиса жаҳонда озиқ-овқат хавфсизлигини яна хавф остига қўйиши мумкинми, деган саволни юзага келтиради.

Кузатувлар тарихидаги энг кучли «Эль-Ниньо» 1877 йилдан 1878 йилгача кузатилган, ҳодисаси Ҳиндистон, Хитой, Бразилия ва бошқа мамлакатларда 50 миллиондан ортиқ инсоннинг ҳаётига зомин бўлган глобал очликка олиб келувчи шароитларнинг шаклланишига замин яратган. Бу ўша пайтдаги сайёра аҳолиси тахминий сонининг 3 дан 4 фоизигача бўлган қисмини ташкил этган. Агар бу ҳолат бугунги кунда юз берса, камида 250 миллион инсонга тенг бўлади.

«1870-йиллардаги каби бир вақтда юз берадиган кўп йиллик қурғоқчиликлар такрорланиши мумкин. Ҳозир вазият янаям мураккаб, атмосфера ва океанлар 1870-йиллардагига қараганда анча иссиқроқ, бу улар билан боғлиқ экстремал ҳодисалар янада кучлироқ бўлиши мумкинлигини англатади», — деди Вашингтон давлат университети доценти Дипти Сингх.

Унинг таъкидлашича, супер «Эл-Ниньо» билан боғлиқ қурғоқчилик хавфининг ортиши кўплаб минтақаларда озиқ-овқат, сув ва иқтисодий хавфсизликни таҳдид остига қўяди. Бу эса ўзаро боғлиқ ижтимоий-иқтисодий тизимлар учун глобал оқибатларга олиб келиши мумкин.