Rossiya prezidenti Vladimir Putin pravoslav Pasxa bayrami munosabati bilan 11-aprel soat 16:00 dan 12-aprel oxirigacha o‘t ochishni to‘xtatishni e’lon qildi.

Kreml bayonotida Rossiya Ukraina ham bu tashabbusga qo‘shilishini kutayotgani ta’kidlangan.

Biroq Kiyev bu qarordan avval Moskva bir necha bor Pasxa bayrami uchun sulh chaqiriqlarini e’tiborsiz qoldirganini bildirdi. Ukraina prezidenti Vladimir Zelenskiy so‘nggi haftalarda bir necha bor o‘t ochishni to‘xtatishni taklif qilgan.

Zelenskiy Rossiya bayonotiga javoban Ukraina «Moskva kabi» javob berishga tayyor ekanini aytdi. Uning ta’kidlashicha, «odamlar Pasxani xavfsiz nishonlashlari kerak va bu tinchlikka real qadam bo‘lishi lozim».

Ayni paytda Rossiya-Ukraina urushida diplomatik jarayonlar sekinlashgani qayd etilmoqda. OAV ma’lumotlariga ko‘ra, Kreml vakili Kirill Dmitriyev AQShga tashrif buyurib, muzokaralar o‘tkazmoqda.

Xabarlarga ko‘ra, muhokamalar Ukrainadagi urushni to‘xtatish va Rossiya–AQSh iqtisodiy hamkorligini ham qamrab oladi.

Shu bilan birga, sanksiyalar masalasi ham dolzarb bo‘lib qolmoqda. Zelenskiy AQShni Rossiya neftiga qarshi cheklovlarni qayta joriy etishga chaqirdi.

Uning fikricha, sanksiyalar bekor qilinishi Moskvaga milliardlab dollar daromad keltirgan.