Toshkent shahrida O‘zbekiston Birinchi xonimi Ziroat Mirziyoyeva va Ozarbayjon Birinchi xonimi Mehribon Aliyevaning uchrashuvi bo‘lib o‘tdi.

Qo‘shma dastur doirasida Birinchi xonimlar Islom sivilizatsiyasi markaziga tashrif buyurdi. Markaz ekspozitsiyalari O‘zbekiston hududida shakllangan qadimiy sivilizatsiyalardan tortib, bugungi Yangi O‘zbekistonning taraqqiyot bosqichigacha bo‘lgan tarixiy jarayonlarni yaxlit manzara sifatida namoyon etadi.

Ziroat Mirziyoyeva va Mehribon Aliyeva «Islomgacha bo‘lgan sivilizatsiyalar» zali, Birinchi va Ikkinchi Renessans davrlariga bag‘ishlangan ekspozitsiyalar, shuningdek, «Yangi O‘zbekiston» zali bilan tanishdilar. O‘zbekiston va Ozarbayjon xalqlari o‘rtasidagi ko‘p asrlik tarixiy va madaniy aloqalarni aks ettiruvchi muzey eksponatlarini ham ko‘zdan kechirdi.

Tashrif yakunida Birinchi xonimlar ekspozitsiyaning ma’naviy va me’moriy markazi bo‘lgan «Qur’on zali» bilan tanishdilar. Zalning eng noyob yodgorligi Usmon Mushafi bo‘lib, u muqaddas Qur’onning bizgacha yetib kelgan eng qadimiy qo‘lyozmalaridan biridir. VII asrga mansub ushbu noyob islom yozma madaniyati yodgorligi YuNESKOning «Jahon xotirasi» xalqaro reyestriga kiritilgan.

Samimiy suhbat chog‘ida O‘zbekiston va Ozarbayjon o‘rtasidagi gumanitar va madaniy aloqalarni yanada mustahkamlash muhimligi, shuningdek, ikki qardosh xalqni mushtarak tarix, madaniy an’analar va ma’naviy qadriyatlar birlashtirib turgani alohida ta’kidlandi.