Amerika Qo‘shma Shtatlari o‘z vatanida ta’qib yoki zo‘ravonlikdan qo‘rqayotganini da’vo qilgan arizachilarga noimmigratsion vizalar berishni to‘xtatadi.

Ushbu qoida o‘zgarishi The Washington Post tomonidan ko‘rib chiqilgan AQSh Davlat departamentining ichki direktivasida e’lon qilindi. 

AQSh konsulliklarida turizm, o‘qish yoki ishlash uchun viza olishda ariza beruvchilardan o‘z vatanida zo‘ravonlikka duch kelganmi yoki yo‘qmi va o‘z vataniga qaytish uchun ta’qibdan qo‘rqadimi, deb so‘raladi. Agar ariza beruvchi bitta savolga ham «ha» deb javob bersa, uning noimmigratsion vizaga arizasi rad etiladi. 

WP ta’kidlaganidek, qoidalarni kuchaytirish orqali AQSh oddiy viza bilan mamlakatga kirgandan keyin boshpana so‘rab murojaat qiluvchilar sonini cheklashga harakat qilmoqda. Davlat departamentining o‘zi immigratsiya tizimi suiiste’mol qilinishining oldini olish uchun mo‘ljallangan «konsulliklar milliy xavfsizlikning birinchi himoya chizig‘idir» shiorini ta’kidlaydi. 

Tramp ma’muriyati ilgari talaba vizasiga ariza beruvchilar uchun skrining jarayonini kuchaytirgan edi. Bundan tashqari, yanvar oyida AQSh 75 mamlakat fuqarolariga immigratsion vizalar berishni to‘xtatdi.