AQSh Ichki xavfsizlik departamenti (DHS) bosh inspektori Ichki xavfsizlik departamenti sobiq kotibi Kristi Noemga nisbatan tergov boshladi.

Bu haqda The Wall Street Journal bu masala bilan tanish manbalarga tayanib xabar berdi.

Ularning so‘zlariga ko‘ra, tergov Noem xonimning omborlarni sotib olish va ularni vaqtinchalik saqlash markazlariga aylantirish bo‘yicha 38 milliard dollarlik dasturiga qaratilgan. Bu dasturlar Immigratsiya va bojxona nazorati (ICE) tomonidan hibsga olingan noqonuniy muhojirlarni ushlab turish uchun mo‘ljallangan edi. 

Avvalroq WSJ gazetasi bosh inspektor Noem xonim boshchiligida DHS shartnoma tuzish amaliyotini ko‘rib chiqayotgani haqida xabar bergan edi. Endi, manbalarga ko‘ra, u «ICEʼning vaqtinchalik saqlash joylarini sotib olish auditini» o‘tkazishni rejalashtirgan. 

ICE allaqachon 11 ta bo‘sh omborni sotib olgani haqida xabar berilgan edi. COStar ma’lumotlariga ko‘ra, agentlik omborlarni sotib olishda odatiy narxga nisbatan o‘rtacha 11-13 foiz ortiqcha to‘lagan. Manbalarning ta’kidlashicha, ushbu dastur bo‘yicha shartnomalar ilgari hech qachon bunday inshootlarni jihozlamagan kompaniyalarga berilgan. WSJ manbalarining ta’kidlashicha, ushbu dastur ko‘plab hukumat amaldorlari orasida hayratga sabab bo‘lgan, chunki agentlik buning o‘rniga bunday keng ko‘lamli ta’mirlashni talab qilmaydigan foydalanilmagan davlat va xususiy qamoqxonalarni sotib olishi mumkin edi. 

Joriy yilning mart oyida Noem xonim iste’foga chiqqanidan so‘ng, uning DHSʼdagi vorisi Markueyn Mallin omborlarni sotib olish dasturini darhol to‘xtatdi.