AQSh prezidenti Donald Tramp ma’muriyati Eron bilan Ho‘rmuz bo‘g‘ozi atrofida yuzaga kelgan keskinlik uzoq davom etishi mumkinligiga tayyorgarlik ko‘rmoqda. Axios nashrining yozishicha, vaziyatning qancha davom etishi Tehronning keyingi harakatlariga bog‘liq.

Nashr manbalariga ko‘ra, dastlab Eronning raketa salohiyati va yadroviy dasturini cheklashga qaratilgan harbiy operatsiya endi dunyo energetikasi uchun strategik ahamiyatga ega Ho‘rmuz bo‘g‘ozi nazorati atrofidagi kurashga aylangan.

Ma’lum qilinishicha, Donald Tramp 60 kunlik o‘t ochishni to‘xtatish tartibi amalda tugaganini bildirgan. Shundan so‘ng AQSh Ho‘rmuz bo‘g‘ozi yaqinida va Eron hududidagi ayrim infratuzilma obyektlariga yangi zarbalar bergan. Eron esa Kuvayt va Bahrayndagi AQSh harbiy obyektlariga hujumlar bilan javob qaytargan.

Shu bilan birga, Tramp Eron rasmiylari kelishuvga erishish istagini bildirganini aytdi. Biroq Tehron bu borada rasmiy tasdiq bermagan.

Eron parlamenti raisi Muhammad Boqir Qolibof AQShni kelishuvlarni buzishda ayblab, Ho‘rmuz bo‘g‘ozi faqat Eron belgilaydigan shartlar asosida ochilishini ta’kidladi.

Axios nashrining ta’kidlashicha, Vashington uchun Ho‘rmuz bo‘g‘ozida xalqaro kemalar harakatini tiklash asosiy maqsadga aylangan. AQSh rasmiylari, agar Eron kemalar harakatiga to‘sqinlik qilishda davom etsa, harbiy bosim yanada kuchaytirilishini istisno qilmayapti.

AQSh vitse-prezidenti Jey Di Vens ham Vashington pozitsiyasi o‘zgarmaganini bildirib, Ho‘rmuz bo‘g‘ozi ochiq qolishi shartligini ta’kidladi. Uning so‘zlariga ko‘ra, agar Eron bo‘g‘ozni yopishga urinsa, AQSh harbiy javob qaytaradi.