2025-yil 14-dekabrdan boshlab Qozog‘istonning «Yo‘lovchi tashish» kompaniyasi «Olmaota – Toshkent» yo‘nalishida har kunlik «Talgo» poyezdi qatnovini yo‘lga qo‘yadi.

Yangi jadval orqali kuniga 400 dan ortiq yo‘lovchi tashish imkoni yaratiladi.

Yo‘nalishda yuqori darajadagi qulaylikka ega Talgo sostavlari harakat qiladi. Har kunlik qatnovlar yo‘lovchilar uchun barqaror harakatni ta’minlab, safarlarni yanada qulay va moslashuvchan tarzda rejalashtirish imkonini beradi.

Har kunlik qatnovning joriy etilishi Qozog‘iston va O‘zbekiston o‘rtasidagi transport aloqalarini mustahkamlash, turizm oqimini oshirish hamda ikki mamlakat o‘rtasidagi madaniy va ishbilarmonlik rishtalarini yanada rivojlantirishni maqsad qiladi.

Kelgusi qish mavsumida boshqa yo‘nalishlarda ham poyezdlar harakat jadvalida qo‘shimcha o‘zgarishlar kiritish rejalashtirilgan.

Chiptalarni rasmiy veb-sayt – bilet.railways.kz orqali yoki temir yo‘l vokzallaridagi bilet kassalarida sotib olish mumkin. Poyezd harakati haqidagi ma’lumotni onlayn tabloda — tablo-railways.kz saytida ko‘rish mumkin.