Франция ҳукумати 2026 йилнинг сентябридан бошлаб 15 ёшгача бўлган болаларга ижтимоий тармоқлардан фойдаланишни, шунингдек, ўрта мактабларга мобил телефонлар билан киришни тақиқлашни режалаштирмоқда.

Le Monde ва France Info нашрларининг ёзишича, ҳукумат январ ойи бошида кўриб чиқиш учун тегишли қонун лойиҳасини тақдим этади.

Президент Эммануэл Макрон бир неча бор ижтимоий тармоқларни ёшлар зўравонлигининг сабаби сифатида тилга олган ва ўтган йилнинг декабр ойида дунёда биринчи марта 16 ёшгача бўлган ўсмирлар учун ижтимоий тармоқлардан фойдаланишни тақиқаган Австралиядан ўрнак олиш ниятини билдирган.

Янги йил нутқида эса Франция раҳбари таклиф қилинган қонун лойиҳаси ҳақида гапирмаган бўлса-да, «ёш авлодни ижтимоий тармоқ ва гаджетлардан ҳимоя қилиш»га ваъда берган.

Reuters нашрининг таъкидлашича, 2018 йилдан бери Франциянинг бошланғич ва ўрта мактабларида мобил телефонлар тақиқланган ва янги чоралар тақиқни юқори синф ўқувчилари учун ҳам татбиқ этади. Бундан ташқари, 2023 йилда Франция ижтимоий тармоқ платформаларидан 15 ёшгача бўлган болаларни рўйхатдан ўтказиш учун ота-оналарнинг розилигини олишни талаб қилувчи қонун қабул қилган, аммо техник қийинчиликлар уни амалга оширишга тўсқинлик қилаётган эди.