Покистон Эрон ва АҚШ ўртасида тинчлик музокараларини қайта йўлга қўйиш учун навбатдаги дипломатик уринишни амалга оширмоқда.

BBC нашрининг хабар беришича, Покистон Қуролли кучлари қўмондони, фельдмаршал Осим Мунир Теҳронга ташриф буюриб, Эроннинг юқори мартабали расмийлари билан музокара ўтказади.

Эрон Ташқи ишлар вазирлиги маълумотига кўра, Мунир душанба куни Теҳронга етиб боради. Бу унинг жорий йилда Эронга учинчи ташрифи бўлади.

Эрон ТИВ матбуот котиби Исмоил Бақоий сафар Покистоннинг минтақада тинчлик ва хавфсизликни мустаҳкамлашга қаратилган саъй-ҳаракатларининг давоми эканини билдирди.

Покистонлик расмийлар ҳам ташриф бўлиб ўтишини тасдиқлаган, бироқ музокаралар кун тартиби тафсилотларини очиқламаган.

Осим Мунирнинг Эронга биринчи ташрифи апрел ойида амалга оширилган эди. Бу АҚШ ва Эрон ўртасидаги сўнгги ўн йилликлардаги илк тўғридан-тўғри музокаралардан бир неча кун ўтиб содир бўлган. Ўша учрашувлар сезиларли натижа бермаган.

Иккинчи ташриф май ойида, АҚШ давлат котиби Марко Рубио Вашингтон ва Теҳрон ўртасидаги мулоқотда «кичик силжиш» қайд этилганини айтган пайтга тўғри келган.

Исломобод сўнгги ойларда АҚШ ва Эрон ўртасидаги кескинликни юмшатиш ҳамда музокараларни тиклашда воситачилик қилишга ҳаракат қилиб келмоқда.

Шу билан бир вақтда Вашингтон Эронга қарши янги иқтисодий санкциялар эълон қилишга тайёргарлик кўрмоқда.

АҚШ молия вазири Скотт Бессент режалаштирилаётган чораларни «душманга қарши қачонлардир ташкил этилган энг йирик молиявий ҳужум» деб атаган.

Санкцияларнинг аниқ мазмуни ва қайси соҳаларни қамраб олиши ҳозирча очиқланмаган.

Шу тариқа, Покистон Теҳрон ва Вашингтонни яна музокара столига қайтаришга уринар экан, АҚШ Эронга иқтисодий босимни янада кучайтиришга тайёрланмоқда.