АҚШ президенти Дональд Трамп НАТО бош котиби Марк Рютте билан Оқ уйда ўтказилган учрашувда Россиянинг икки йирик нефть компанияси — «Роснефть» ва «Лукойл», шунингдек уларнинг ўнлаб шўъба корхоналарига қарши жиддий санкциялар жорий этилганини маълум қилди.

Трампнинг айтишича, бу қарор Владимир Путиннинг «ақлини киритиш» ва Украинадаги урушни тугатишга ундаш мақсадида қабул қилинган.

«Бу катта санкциялар – нефть соҳасига оид. Дунёдаги энг йирик икки компания – улар русларга тегишли ва жуда кўп нефть қазиб олади.
Умид қиламанки, бу қарор Путинни ҳам, Зеленскийни ҳам тўғри йўлга солади. Билишингиз керак, танго рақсини икки киши ижро этади, улар эса бир-бирини жуда ёмон кўради», – деди Трамп.

Санкциялар Трамп маъмуриятига нисбатан бир неча ой давом этган конгрессдаги икки партияли босим ортидан жорий этилди. Қонун чиқарувчилар ундан Россиянинг нефть соҳасига қарши аниқ чоралар кўришни талаб қилган эдилар.

НАТО бош котиби Марк Рютте ўз навбатида, мунтазам босим орқали Россия президентини музокаралар столига ўтқазиш ва отешкесимга эришиш мумкинлигини билдирди. Учрашув чоғида, шунингдек, Канада ва ЕИ мамлакатлари томонидан Украина учун молиялаштирилаётган қурол-яроғ етказиб бериш масаласи муҳокама қилинди.

Шу билан бирга, Украина президентининг «Томагавк» узоқ масофали ракеталарини олиш ҳақидаги сўровига жавоб берган Трамп, украин ҳарбийларини улардан фойдаланишга ўргатиш учун «камида олти ой, эҳтимол бир йил» вақт керак бўлишини таъкидлади.

Санкциялар ҳақидаги баёнот Трампнинг Будапештда Россия президенти билан учрашувни «фойдасиз» деб ҳисоблаб, ундан бош тортганидан бир кун ўтиб эълон қилинди.

Бу орада чоршанба куни Россия Украина шаҳарларига кенг кўламли авиаҳужум уюштирди. Ҳужумлар натижасида камида етти киши, жумладан болалар ҳам ҳалок бўлгани маълум қилинди.