Россия 18–19 октябрь кунлари АҚШга расмий мақомга эга бўлмаган, аммо дипломатик аҳамиятга эга «non-paper» ҳужжатини тақдим этди. Бу ҳақда Reuters агентлиги АҚШ ҳукуматидаги манбаларига таяниб хабар қилди.

Манбаларга кўра, Москва ҳужжатда Украинада тинчликни таъминлаш учун яна ўзининг аввалдан маълум бўлган талабларини такрорлаган.

Жумладан, Донбасс ҳудудининг тўлиқ назорати Россия томонига ўтиши ва НАТО қўшинларининг Украина ҳудудида жойлаштирилишини мутлақо қабул қилиб бўлмаслиги ҳақидаги талаблар.

Қайд этилишича, бу позиция АҚШ президенти Дональд Трамп таклиф этган — фронт чизиғи бўйича жангларни тўхтатиш ва жараённи музлатиш ташаббусини рад этади.

Трамп 17 октябрь куни Владимир Зеленский билан учрашувдан сўнг «урушни тўхтатиш ва келишувга келиш вақти келгани» ҳақида баёнот берган эди. Зеленский ҳамда қатор Европа давлатлари раҳбарлари бу таклифни қўллаб-қувватлади.

Бироқ Россия ташқи ишлар вазири Сергей Лавровнинг таъкидига кўра, ҳозирги пайтда ўт очишни тўхтатиш «бу — урушнинг чин сабабларини эътибордан четда қолдириш бўлади». У, шунингдек, Россия «ўз талабларидан» воз кечмаслигини билдирди.

Шунингдек, АҚШ ва Россия президентлари ўртасида икки ҳафта ичида Будапештда ўтказилиши кутилган учрашув, Reuters ва NBC News маълумотларига кўра, вақтинча тўхтатиб турилган.