АҚШ президенти Дональд Трамп мамлакат Марказий разведка бошқармасига (МРБ) Венесуэла ҳудудида яширин операциялар ўтказиш учун рухсат берганини маълум қилди. Бу ҳақда у чоршанба куни кечқурун ОҚ уйда журналистлар билан суҳбатда айтди.

Трампнинг баёноти сўнгги ҳафталарда АҚШ ҳарбийлари Кариб денгизи ҳудудида наркотик моддалар ташишда гумон қилинган кемаларга зарбалар берганидан сўнг янгради. Сентябрдан бери камида бешта қайиқ йўқ қилинган, 27 киши ҳалок бўлган. Маълумотларга кўра, уларнинг тўрттаси Венесуэладан чиққан.

Президентнинг сўзларига кўра, Вашингтон бундай қарорни қабул қилишга икки асосий омил туфайли мажбур бўлган.

«Мен буни икки сабаб билан санкция қилдим.

Биринчидан, улар ўз турмаларидаги маҳбусларни Америка Қўшма Штатларига юборишди.

Иккинчидан, наркотиклар – Венесуэладан АҚШга кўп миқдорда гиёҳванд моддалар келмоқда ва уларнинг кўп қисми денгиз орқали ташилади», – деди Трамп.

Унинг қўшимча қилишича, маъмурият «қуруқликдаги зарбаларни ҳам кўриб чиқмоқда».

Шу куннинг ўзида Венесуэла президенти Николас Мадуро миллий телевидениеда чиқиш қилиб, МРБнинг дунё бўйлаб низолардаги фаолиятини танқид қилди ва тинчликка даъват этди.

Мадуро МРБнинг фаолиятини танқид қилиб, унинг «режим алмаштириш амалиётлари»ни Афғонистон, Ироқ ва Ливиядаги узоқ давом этган фожиалар билан солиштирди.

«МРБ амалга оширган тўнтаришларга йўқ, деймиз! Бу бизга Аргентинадаги ҳарбий диктатура (1976–1983) даврида бедарак йўқолган 30 минг одамни эсга солади», – дейди у.

Мадуро Чилидаги 1973 йилги тўнтаришни ҳам ёдга олган ва Лотин Америкаси буни хоҳламаслигини, эҳтиёж сезмаётганини қўшимча қилган.

Венесуэла Ташқи ишлар вазирлиги ҳам бу борада расмий баёнот бериб, Трампнинг сўзларини «урушга чақирувчи ва хатарли» деб атади.

«АҚШ президентининг бу баёноти халқаро ҳуқуқ ва БМТ Низомига зид бўлиб, жаҳон ҳамжамияти томонидан қатъий қораланиши лозим», – дейилади вазир Иван Гилнинг Telegram-каналидаги билдирувда.

АҚШ Конгрессининг икки йирик партия вакиллари ҳам Трамп маъмуриятининг Венесуэла наркокартелларига қарши ҳарбий ҳаракатларини танқид қилди.

Бу ой бошида Трамп маъмурияти венесуэла наркокартелларини террорчи гуруҳлар деб эълон қилган ва АҚШ «улар билан қуролли тўқнашувда» эканини билдирган. Расмий изоҳга кўра, бу наркотик оқимини тўхтатиш учун зарур қадам бўлган.

Бироқ конгрессменлар Трампни Конгресс рухсатисиз уруш бошлаганликда айблади.

Шу билан бирга, икки нафар америкалик расмийнинг айтишича, ҳозирча ҳужум қилинган қайиқлар ҳақиқатдан ҳам гиёҳванд моддалар ташиганига оид далиллар тақдим этилмаган.