Ўзбекистонда йил бошидан буён 7 млрд кВт⋅соат «яшил» энергия ишлаб чиқарилди. Бу ҳақда Энергетика вазирлиги хабар қилди.

Маълум қилинишича, бугунги кунда мамлакатда умумий қуввати 5 602 мегаватт бўлган 21 та «яшил» электр станцияси фаолият юритмоқда. Улардан 15 таси қуввати 3 930 МВт бўлган қуёш электр станциялари, 6 таси эса қуввати 1 672 МВт бўлган шамол электр станцияларидир.

«Яшил» энергия ишлаб чиқариш ҳажми йиллар кесимида қуйидагича бўлди:

• 2022 йил — 434 млн кВт⋅соат;
• 2023 йил — 576,9 млн кВт⋅соат;
• 2024 йил — 4,9 млрд кВт⋅соат;
• 2025 йил — 10,5 млрд кВт⋅соат;
• 2026 йилнинг январ–июл ойларида — 7 млрд кВт⋅соат.

Натижада, сўнгги тўрт йил ва 2026 йилнинг бугунги кунига қадар жами 23,4 млрд кВт⋅соатдан ортиқ «яшил» энергия ишлаб чиқарилди.

Бу эса қарийб 6,24 млрд куб метр табиий газ тежалишига ҳамда атмосферага тахминан 13,46 млн тонна зарарли газ чиқарилишининг олди олинишига хизмат қилди.

Энергетика вазирлиги таъкидлашича, мазкур кўрсаткичлар қайта тикланувчи энергия манбаларини кенг жорий этиш нафақат электр энергияси ишлаб чиқариш ҳажмини ошираётганини, балки табиий ресурсларни тежаш ва атроф-муҳитни муҳофаза қилишга ҳам салмоқли ҳисса қўшаётганини кўрсатади.