Андижон вилоятида 216,8 млн сўмлик сифати кафолатланмаган дори воситаларини савдога чиқарилишининг олди олинди. 

Бош прокуратура ҳузуридаги Департаментнинг Андижон вилояти бошқармаси, ИИБ ва Божхона бошқармаси ходимлари ҳамкорлигида тезкор тадбир ўтказилган. Унда қонунга хилоф равишда дори воситалари савдоси билан шуғулланиб келган Г.Б. ва бошқалар “Tracker” русумли автомашинада 200 дона “Вокартин” дори воситасини Избоскан тумандаги хусусий шифохонага ўтказиш мақсадида олиб келган вақтида ушланиб, тадбир давомида умумий баҳоси 216,8 млн сўмлик 16 турдаги жами 3 525 дона дори воситалари ашёвий далил сифатида олинган.

Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.