Тошкент вилоятида фаолият юритувчи тадбиркор К. Якубовнинг онлайн-аукцион орқали қонуний равишда ютиб олинган ер участкасини расмийлаштиришда юзага келган муаммолари Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил (Бизнес Омбудсман) томонидан ўрганиб чиқилди.

Ўрганиш жараёнида Давлат активларини бошқариш агентлиги ҳамда Кадастр агентлиги билан ҳамкорликда масала атрофлича таҳлил қилиниб, мавжуд кадастр маълумотларидаги номувофиқликлар аниқланди. Натижада, Вазирлар Маҳкамасининг 2023 йил 29 августдаги 426-сон қарори асосида ташкил этилган ҳудудий комиссия томонидан низо судгача тартибда кўриб чиқилди.

Комиссия хулосасига кўра, аукцион ҳужжатларида кўрсатилган 0,2166 гектар ер майдонининг амалдаги ҳолати тасдиқланиб, кўчмас мулкка бўлган ҳуқуқни давлат рўйхатидан ўтказишни рад этиш бекор қилинди ҳамда ер участкасини белгиланган тартибда расмийлаштириш бўйича қарор қабул қилинди.

Бизнес Омбудсман институти тадбиркорлик субъектларининг ҳуқуқларини ҳимоя қилиш, давлат органлари фаолиятида қонунийликни таъминлаш ва тадбиркорларнинг мурожаатларини тезкор ҳал этиш бўйича ишларини изчил давом эттирмоқда.