2028 йилгача Марказий Осиёдаги камида 3 та давлат билан ID-карталар орқали фуқароларнинг чегаралардан эркин ўтиши мумкин бўлган келишувларга эришиш режалаштириляпти.

Бу ҳақда жамоатчилик муҳокамасига қўйилган янгиланган Ўзбекистон-2030 стратегияси лойиҳасида сўз боради. 

Стратегия лойиҳасида Ташқи ишлар вазирлигига Марказий Осиё минтақасида амалий ҳамкорликни сифат жиҳатидан янги босқичга олиб чиқиш вазифаси қўйилган бўлиб, унда, жумладан, жорий ва 2027 йилларда камида 3 та давлат билан ID-карталар асосида фуқароларнинг чегараларни эркин ўтиши мумкин бўлган келишувларга эришиш назарда тутилади.

Шунингдек, Марказий Осиё давлатлари билан ўзаро товар айирбошлаш ҳажмини ҳозирги кундаги 11 миллиард доллардан 15 миллиард долларига етказиш ҳам режа қилиняпти.

Эслатиб ўтамиз, Ўзбекистон 2023 йил сентябрда Қирғизистон билан божхона чегара постида хорижга чиқиш паспортисиз фақатгина ID-карталар орқали кесиб ўтиш ва у ерда 30 кунгача визасиз бўлиш имконияти йўлга қўйилган эди.