The Washington Post нашрига яқин манбаларга кўра, АҚШ президенти Дональд Трамп Венесуэла мухолифати етакчиси Мария Корина Мачадони қўллаб-қувватлашдан бош тортган. Бунга сабаб — Мачадо Нобель тинчлик мукофотини Трамп фойдасига рад этмагани.

Нашр суҳбатдошларидан бирига кўра, Мачадо мукофотни Трампга бағишлаган бўлса-да, уни қабул қилгани Оқ уйда «энг катта хатолик» сифатида баҳоланган.

«Агар у мукофотдан воз кечиб, «Бу мукофот Дональд Трампники», деганида эди, бугун Венесуэла президенти бўларди», – дейди манба.

Трамп эса Венесуэладаги сўнгги воқеалар юзасидан ўтказилган матбуот анжуманида Мачадони «яхши аёл» деб атаган, аммо унинг мамлакат ичида «етарли қўллаб-қувватлов ва ҳурматга эга эмаслиги»ни айтган. Шу сабабли, унинг давлат раҳбари бўлиши қийин эканини таъкидлаган.

Нашр шахсий сиёсий амбициялар ва Нобель мукофоти атрофидаги масала АҚШнинг Венесуэла мухолифатига муносабатига таъсир кўрсатганига шама қилади.

Эслатиб ўтамиз, 2025 йилнинг октябрида Нобел қўмитаси тинчлик бўйича Нобель мукофотига венесуэлалик мухолиф сиёсатчи Мария Корина Мачадони лойиқ деб топган эди. Ваҳоланки, АҚШ президенти Дональд Трамп ҳам Тинчлик бўйича Нобел мукофотига бир неча бор ўз номзодини илгари суриб келаётган эди. Ҳатто 7 та давлат раҳбарлари ҳам Трамп номзодини ушбу мукофот учун илгари сурган.