Ўзбекистонда 2026 йил 1 июлдан бошлаб янги объектлар бўйича лойиҳалаштириш ва қурилиш-монтаж ишларини бир вақтда амалга ошириш (параллел қурилиш) амалиёти бекор қилинади. Бу президентнинг тегишли фармонида кўзда тутилган.

Унинг ўрнига тажриба-синов тариқасида босқичма-босқич тайёрланадиган лойиҳа асосида қурилиш ишларини олиб бориш тартиби жорий этилади. Мазкур тартиб тадбиркорлик субъектларининг ўз маблағлари ва тўғридан-тўғри хорижий инвестициялар ҳисобидан молиялаштириладиган объектларга (кўп квартирали уй-жойлар) татбиқ этилади.

Қурилиш-монтаж ишлари объектнинг ҳар бир босқичи бўйича лойиҳа-смета ҳужжатлари экспертизадан ўтказилгандан ва Инспекция томонидан рўйхатга олингандан сўнг режа-график асосида бошланади.

Қурилиш-монтаж ишларини белгиланган тартиб-таомилларга мувофиқ олиб бориш жараёнлари Инспекция томонидан «Қурилишда давлат назорати» электрон платформасида мониторинг қилиб борилади.

Қурилиш вазирлиги Инспекция билан биргаликда 2027 йил якунига қадар тажриба-синовнинг ижобий натижаларига кўра уни давом эттириш ва бошқа йўналишларда татбиқ этиш юзасидан таклифларни Вазирлар Маҳкамасига киритади.

Шунингдек, қиймати базавий ҳисоблаш миқдорининг 25 минг бараваригача бўлган объектлар учун давлат харидлари бўйича техник топшириқларни экспертизадан ўтказиш амалиёти бекор қилинмоқда.

Ҳужжатга кўра, пудрат ва лойиҳа ташкилотларининг ишлаб чиқариш салоҳиятини ошириш мақсадида 2029 йил 1 июлга қадар Ўзбекистонда ишлаб чиқарилмайдиган қурилиш махсус техникалари ҳамда лаборатория ва инструментал кўрик асбоб-ускуналарини импорт қилишда божхона божи ундирилмайди.