Бугун, 12 март куни Тошкент шаҳридаги Темур Малик ва Буюк Ипак йўли кўчалари кесишмаси атрофидаги туннель йўлида тиргак деворнинг бир қисми қисман ўпирилиб тушди.

Пойтахт ҳокимлиги ҳодисада жабрланганлар йўқлигини маълум қилди. Воқеа жойига зудлик билан авария хизматлари, техник мутахассислар ва масъул ташкилотлар вакиллари юборилган. Ҳодиса содир бўлган ҳудуд ўраб олинган, зарур хавфсизлик чоралари кучайтирилган.

«Ҳозирда комплекс техник текширув ўтказилмоқда. Текширув якунланмагунча, узил-кесил хулоса чиқаришга ҳали эрта», – дейилади расмий маълумотда.

Шу билан бирга, сўнгги кунлардаги кучли ёғингарчилик таъсири, жумладан, тупроқнинг ҳаддан ташқари намланиши ва конструкцияга тушадиган юкламанинг ортишини «дастлабки тахминлар» қаторида санаб ўтилди.

Ҳокимлик, ўз навбатида, носозликни бартараф этиш даврида Темур Малик кўчасининг Мирзо Улуғбек кўчаси билан кесишмасидан Султония кўчаси кесишмасигача бўлган қисми барча авторанспорт воситалари ҳаракати учун вақтинча ёпилганини эълон қилди.
 

Шу ўринда, Буюк ипак йўли кўчаси бўйлаб ҳаракатланиш чекланмайди, бироқ Буюк ипак йўли кўчасидан Темур Малик кўчасига тушиш-чиқиш йўллари вақтинча ёпилади.

Шунингдек, автобуслар ҳаракати ҳам бошқа йўналишларда йўлга қўйилди.

Жумладан:

• 49-сонли автобус йўналишининг ТТЗ АШБ томон ҳаракати Т.Малик, Султония, Шўртепа-2, Шўртепа, Т.Малик кўчалари орқали ташкил этилади;
• 128-сонли автобус йўналишининг ҳаракати икки томонлама Т.Малик, Дўрмон йўли, Мирзо Улуғбек, Т.Малик кўчалари орқали ташкил этилади;
• 149-сонли автобус йўналишининг ҳаракати икки томонлама Мингбулоқ, Ш.Бурхонов, Мирзо Улуғбек, Т.Малик кўчалари орқали ташкил этилади.