Тошкент шаҳар ҳокимияти пойтахт транспорт тизимини тубдан ўзгартиришга қаратилган йирик ислоҳотни тақдим этди. Унда тезкор автобуслар тизими — BRT (Bus Rapid Transit) жорий этиш ва шаҳарнинг энг юклама юқори нуқталаридан бири бўлган «Буюк Ипак йўли» метро атрофида янги транспорт ечимлари қуриш кўзда тутилган.

Лойиҳаларнинг асосий мақсади — йўл тармоқлари ўтказувчанлигини ошириш ва тирбандликни камайтириш.

Ислоҳотнинг марказий қисми 16,2 километрли BRT йўналиши бўлади. У Сергели тумани билан шаҳар марказини боғлайди ва йирик кўчалар — Шота Руставели, Шаҳрисабз ҳамда Амир Темур проспекти орқали ўтади.

Бу тизимнинг асосий хусусияти — автобуслар учун алоҳида ажратилган йўлаклар бўлиб, улар умумий транспорт оқимидан тўлиқ ажратилади. Бу эса:

– ҳаракат тезлигини барқарорлаштиради;
– жамоат транспорти кечикишини камайтиради;
– метро билан интеграцияни кучайтиради.

Яъни, шаҳар аста-секин «автомобил устуворлиги» эмас, балки жамоат транспорти устувор бўлган моделга ўтмоқда.

Ислоҳотнинг иккинчи муҳим қисми – «Буюк Ипак йўли» метро атрофидаги транспорт тугунини қайта қуришдир.

Ҳозирда бу ҳудуддан соатига ўртача 8,2 мингта автомобиль ўтади. Лойиҳа амалга оширилгандан кейин бу кўрсаткич 19,2 мингтагача ошиши кутилмоқда.

Бунинг учун икки қаватли йўл ечимлари, айлана ҳаракатли йўл ва транспорт оқимини қайта тақсимлаш каби ечимлар жорий этилади.

Мутахассислар ҳисоб-китобларига кўра, бу орқали умумий ўтказувчанлик 21 фоизга ошади ва кунлик автомобиль ҳаракати 120 мингтагача етади. Шунингдек, ўртача тезлик 21 км/соатдан 26 км/соатгача кўтарилади ҳамда тирбандликда юриш вақти 45 дақиқадан 32 дақиқагача қисқаради.

Бу рақамлар шаҳардаги ҳаракат самарадорлиги сезиларли яхшиланишини кўрсатади.

Лойиҳани амалга оширишда Хитой компанияси иштирок этмоқда. Қайд этилишича, молиялаштириш ва қурилиш босқичма-босқич амалга оширилади.