Ўзбекистонда жисмоний шахслар ўртасида мобил телефон рақами орқали банк ҳисобварағидан тўғридан-тўғри пул ўтказиш тартиби жорий этилади.

Марказий банк бошқарувининг тегишли қарори 14 август куни қабул қилиниб, 24 августда Адлия вазирлигида 3930-сон билан давлат рўйхатидан ўтказилди. Ҳужжат расмий эълон қилинган кундан уч ой ўтгач кучга киради.

Янги тартиб Марказий банкнинг Тезкор тўловлар тизими орқали амалга оширилади. Бунда фуқаро пул олувчининг карта рақами ёки банк ҳисобварағи реквизитларини киритиши шарт бўлмайди — унинг банк ҳисобварағига боғланган мобил телефон рақами етарли бўлади.

Банк мобил иловаси орқали телефон рақами асосида амалга ошириладиган ўтказмалар суткасига 24 соат, ҳафтасига 7 кун узлуксиз ишлайди.

Банкка шахсан мурожаат қилиб амалга ошириладиган ўтказмалар эса банкнинг иш кунлари ва иш вақтида бажарилади.

Барча жараёнлар автоматик равишда реал вақт режимида амалга оширилиши белгиланган.

Хизматдан фойдаланиш учун мобил телефон рақами банк ҳисобварағига бириктирилади.

Фойдаланувчи бир банк доирасида ўз телефон рақамини фақат битта банк ҳисобварағига боғлаши мумкин. Рақам муваффақиятли боғланганидан сўнг махсус «боғлаш коди» ҳам шакллантирилади.

Фуқаро исталган вақтда мобил илова орқали ёки банкка мурожаат қилиб телефон рақамини ҳисобвараққа боғлашни бекор қилиши мумкин.

Ўтказмани тасдиқлашдан олдин тўловчига:

• ўтказилаётган сумма;
• пул олувчининг фамилияси, исми ва отасининг исми;
• пул тушадиган банк номи;
• воситачилик ҳақи кўрсатилади. Шундан кейин фойдаланувчи операцияни якуний тасдиқлайди.

Агар телефон рақами бир нечта банкдаги ҳисобварақларга боғланган бўлса, тизим пул олувчининг қайси банкда ҳисобварағи борлигини кўрсатади ва тўловчи керакли банкни танлайди.

Ҳужжатнинг 12-саҳифасида келтирилган схемага кўра, жараён телефон рақамини киритишдан бошланиб, олувчининг шахси ва банкини текшириш, банкни танлаш ҳамда тўловни тасдиқлашгача бўлган 9 босқичда автоматик амалга оширилади.

Шу тариқа, янги тизим орқали фуқаролар ўртасида пул ўтказишда банк карта рақами ўрнига мобил телефон рақамидан фойдаланиш имконияти пайдо бўлади.