Тошкент шаҳрининг Сергели туманида йирик нарколаборатория фош этилди. Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор-қидирув тадбирлари натижасида ноқонуний фаолиятга чек қўйилди.

Аниқланишича, Тошкент вилояти Чиноз туманида яшовчи, 2003 йилда туғилган шахс кўп қаватли уйлардан биридаги хонадонни ижарага олиб, у ерда нарколаборатория ташкил этган. Ушбу манзил махсус кузатувдан сўнг фош қилинган.

Тезкор тадбир давомида хонадондан умумий қиймати 4,5 млрд сўмга тенг 3,5 кг «Прегабалин» кучли таъсир қилувчи моддаси, 20 литр суюқ ва 25 кг кукун кўринишидаги прекурсорлар, шунингдек, тайёрлаш ва қадоқлаш учун мўлжалланган анжомлар ашёвий далил сифатида олинди.

Терговга кўра, гумондорлар дастлаб Telegram орқали фаолият юритувчи наркодўконда «кладмен» сифатида иш бошлаган. Улар кучли таъсир қилувчи дори воситаларини тарқатиш билан шуғулланган. Кейинчалик эса жиноий гуруҳ раҳбарларининг ишончига кириб, бевосита тақиқланган моддаларни тайёрлаш жараёнига жалб этилган.

Шунингдек, нарколабораторияда кимёгар сифатида фаолият юритган яна бир Чинозлик фуқаро ҳам ушлангани маълум қилинди.

Мазкур ҳолат юзасидан Давлат хавфсизлик хизматининг Тошкент вилояти бўйича бошқармаси Тергов бўлими томонидан жиноят иши қўзғатилди. Гумондорларга нисбатан «қамоқ» эҳтиёт чораси қўлланилган. Ҳозирда иш бўйича тергов ҳаракатлари давом этмоқда.