Жорий йил 24 декабрдаги ПФ–256-сон фармон билан Маъмурий жавобгарлик тўғрисидаги, Жиноят-ижроия, Жиноят ва Жиноят-процессуал кодексларининг болаларга зўравонлик билан боғлиқ моддалари қайта кўриб чиқилиши белгиланди.

Унда, жумладан, болаларни жисмоний зўравонлик, жинсий зўравонлик ва  жинсий эксплуатация қилиш, руҳий зўравонлик, ғамхўрлик кўрсатмаслик, таъқиб этилишдан (шу жумладан, телекоммуникация тармоқларидан ёки Интернет жаҳон ахборот тармоғидан фойдаланган ҳолда) ҳимоя қилиш билан боғлиқ моддалар қайта кўриб чиқилади.

Бунда Ишчи гуруҳ 2026 йилнинг апрель ойига қадар хорижий давлатлар тажрибаларини ўрганиб, юқорида назарда тутилган жиноий қилмишларга қарши жавобгарликни кучайтиришни назарда тутувчи қонун лойиҳаларини ишлаб чиқади.

Қонун лойиҳасида:

• болаларнинг ўлимига сабаб бўлган жиноий хатти-ҳаракатларни содир этган шахслар амнистия акти асосида, ярашилганлиги муносабати билан жавобгарликдан озод қилинмаслиги, енгилроқ жазо тайинлашва шартли ҳукм қўлланилмаслигига;
• вояга етмаган шахсларга нисбатан жинсий зўравонлик содир этган шахсларни жавобгарликка тортиш ёки жазони ижро этиш муддати ўтиб кетганлиги муносабати билан жавобгарликдан ёки жазодан озод қилишга йўл қўйилмаслигига алоҳида эътибор қаратилади.

Ўз навбатида, ҳужжат билан тегишли вазирлик ва идоралар олдига 2026 йилнинг биринчи чорагига қадар Европа Кенгашининг болаларни жинсий эксплуатация қилиш ва жинсий зўравонликдан ҳимоя қилиш тўғрисидаги Конвенцияга ҳамда Бола ҳуқуқлари тўғрисидаги конвенциянинг хабар бериш тартибига оид факультатив протоколига қўшилиш масаласини кўриб чиқиш вазифаси қўйилган.