Президент Шавкат Мирзиёев «Яшил макон» умуммиллий лойиҳаси доирасидаги кўчат экиш тадбирида иштирок этиб, Миллий дендрология боғини барпо этишга старт берди. Бу ҳақда Президент ахборот хизмати хабар берди.

Мазкур боғ ташкил этилаётган ҳудуддаги «Яшил» университет ҳудудида «Илм – лойиҳа – амалиёт» занжири асосида барпо этилаётган «in-vitro» лабораторияси, Доривор ўсимликлар ҳамда Уруғчилик ва селекция марказлари ҳам шу йилнинг ўзида ишга туширилади.

Шавкат Мирзиёев тадбирда қатнашаётган Бирлашган Миллатлар Ташкилотининг Ўрмонлар бўйича форуми раиси Исмоил Белен, ушбу форумнинг Котибияти директори Жулет Биао, хорижий давлатларнинг Ўзбекистондаги дипломатик корпуси вакиллари ҳамда барча иштирокчиларга самимий миннатдорчилик билдирди.

Сўнг президент тадбир қатнашчилари билан биргаликда Миллий дендрология боғининг илк 5 гектарида манзарали кўчатлар экди. Шу пайтнинг ўзида Ўзбекистон ҳудудларида 21 мингга яқин ватандошлар яна 164 гектар майдонда 88 минг туп кўчат ўтқазди.