АҚШ ва унинг анъанавий иттифоқчилари, жумладан Канада ўртасида мудофаа харажатлари, савдо, президент Дональд Трампнинг Ғазода ўт очишни тўхтатиш режаси ва Украинадаги урушни тўхтатиш бўйича саъй-ҳаракатлар масаласида кескинлик кучайди.

Канада Жанубий Онтарио шаҳрида «Еттилик гуруҳи» (G7) — саноати ривожланган еттита демократик давлат ташқи ишлар вазирларини қабул қилмоқда. Улар мудофаа харажатлари, савдо ва АҚШ президенти Дональд Трампнинг Ғазо бўйича режаси ҳамда Россия ва Украина ўртасидаги урушни тўхтатиш бўйича чоралар ҳақида музокаралар олиб бормоқда.

Канада ташқи ишлар вазири Анита Ананд АҚШ давлат котиби Марко Рубио ва Буюк Британия, Франция, Германия, Италия ҳамда Япониядан келган ҳамкасбларини кутиб олди.

Учрашув сешанба ва чоршанба кунлари бўлиб ўтмоқда. Шунингдек, Европа Иттифоқи ташқи сиёсат раҳбари Кайя Каллас, шунингдек Австралия, Бразилия, Ҳиндистон, Саудия Арабистони, Мексика, Жанубий Корея, Жанубий Африка Республикаси ва Украина ташқи ишлар вазирлари ҳам иштирок этмоқда.

«Биз бир мақсад йўлида муҳим масалаларни ҳал қилаяпмиз – бу АҚШ фуқароларининг хавфсизлиги ва ҳимоясини биринчи ўринга қўйиш», – деб ёзди Рубио ижтимоий тармоқда.

Бу йил G7 саммитини қабул қилаётган Канада ва унинг шимолий қўшниси – АҚШ ўртасидаги муносабатлар Трамп томонидан канада импортига тарифлар жорий этилиши туфайли ёмонлашди.

Бироқ бутун G7 блоки ҳам президент Трампнинг савдо сиёсати ва халқаро можароларни ҳал этиш бўйича таклифлари сабаб жиддий синовларга дуч келмоқда.

Чоршанба куни дипломатлар Украина ташқи ишлар вазири билан учрашмоқда.
Буюк Британия қишнинг яқинлашиши ва Россия ҳужумларининг кучайиши муносабати билан Украина энергия тизимини тиклаш учун 13 миллион фунт стерлинг ажратишини маълум қилди. Бу маблағ электр, иссиқлик ва сув таъминоти тизимларини таъмирлаш ҳамда гуманитар ёрдам учун сарфланади.

«Россия президенти Владимир Путин қишда Украинани муз ва зулматга ботиришга уринмоқда, аммо Британиянинг ёрдами нур ва иссиқликни сақлаб қолишга ёрдам беради», – дейди Буюк Британия ташқи ишлар вазири Иветт Купер.

Шундай баёнотни аввалроқ Канада ҳам берган эди.

G7 аъзоларининг барчаси (Япониядан ташқари) НАТОга аъзо бўлиб, Трамп иттифоқдошлардан ҳарбий харажатларни ялпи ички маҳсулотнинг 5 фоизи даражасигача оширишни талаб қилди.

Баъзи мамлакатлар рози бўлган, баъзилари эса йўқ. Бу талабдан Канада ва Италия энг орқада қолган давлатлар қаторида.

Ананднинг айтишича, Канада бу кўрсаткичга 2035 йилга бориб етишни режалаштирган.

G7 ичида Исроил ва ҲАМАС ўртасидаги уруш борасида ҳам ихтилоф мавжуд:
Буюк Британия, Канада ва Франция ҳатто можаро тугамасидан Фаластин давлатини тан олишини маълум қилган.

Россия–Украина уруши бўйича эса кўпчилик аъзолар Трампга нисбатан анча қаттиқ позицияни эгаллаган.