Буюк Британия нафақат террор ташкилотлари, балки бир қатор давлатларнинг ҳам мисли кўрилмаган таҳдидига дуч келмоқда. Бу ҳақда мамлакат Ички разведка хизмати (MI5) бош директори Кен МакКаллум маълум қилди.

“Давлатлар таҳдиди ортиб бормоқда. Сўнгги йилларда MI5 жосуслик ҳамда парламентимиз, университетларимиз ва муҳим инфратузилмаларимизга таҳдид эҳтимоли сабаб тафтиш этаётган шахслар сони 35 фоизга ортди”, – дейди Кен МакКаллум.

Хитой қироликка таҳдид солаётган биринчи давлат деб зикр қилинган.

Кен МакКаллумнинг фикрича, Пекин кибержосуслик, технологик сирларни ўғирлаш, Буюк Британия ижтимоий ҳаётига яширин равишда аралашиш орқали Буюк Британия хавфсизлигига ҳар лаҳзада таҳдид туғдирмоқда.

Ўтган йили академик Кристофер Берри ва парламент тадқиқотчиси Кристофер Кэш Хитойга Буюк Британия хавфсизлигига таҳдид солувчи маълумотларни етказишда айбланган эди. Ўтган ҳафта прокурорлар мазкур шахслардан айблов олиб ташланганини маълум қилди. Ички разведка хизмати эса бунга эътироз билдирган.

MI5 бош директори Кен МакКаллум Россия ҳамда Эронни ҳам таҳдид туғдираётган уч давлат рўйхатига киритган.

Қайд этилишича, Россия ва Эрон жосусликнинг ўт қўйиш, жисмоний зўравонлик каби қўпол усулларидан тез-тез истифода этади.

“Россия бошбошдоқлик ва бузғунчиликка интилмоқда. Охирги йилнинг ўзида биз полиция билан биргаликда Россия етакчилари душман деб билган шахсларга қаратилган бир қатор ғаразли ҳаракатлар ва фитналарнинг олдини олишга муваффақ бўлдик”, – деган Ички разведка хизмати раҳбари.

MI5 раҳбарига кўра, Эрон ҳам Британия заминида ўз душманларини йўқ қилишга уринмоқда. Сўнгги 12 ой ичида Теҳрон амалга оширгани айтилаётган 20 дан зиёд суиқасдлар йўққа чиқарилган.

Инглиз жамиятининг ижтимоий кайфияти ҳам разведка хизмати хулосасига ҳамоҳанг дейиш мумкин. Аввал хабар берганимиздек, More in Common таҳлил маркази тадқиқотида ҳам респондентлар Хитой, Россия ва Эронни мамлакатнинг асосий душманлари деб атаган эди.