«Нант» клубининг португалиялик дарвозабони Антони Лопеш рўза тутган футболчилар ўйин пайти оғиз очиб олишлари учун ўзини жароҳат олганга солди, деб ёзмоқда Ouest-France ва Give Me Sport нашрлари.

Воқеа Франция чемпионатида «Гавр»га қарши ўйинда содир бўлди. Қуёш ботганидан сўнг, ўйиннинг 74-дақиқасида Лопеш майдонга йиқилиб, сонидаги оғриқдан шикоят қилган. Қоидага кўра, дарвозабонларга тиббий ёрдам бевосита майдоннинг ўзида кўрсатилгани сабабли, шифокорлар уни бир неча дақиқа давомида кўрикдан ўтказишди.

Фурсатдан фойдаланган рўзадор футболчилар оғиз очиб, сув ичиб олиш учун захира ўриндиқлари томон йўл олишди.

Лопеш ўйинни давом эттирди. Учрашувдан сўнг журналистларнинг жароҳат ҳақидаги саволларига у шунчаки кулиб қўйди. Ouest-France ёзишича, посбон озгина танаффус қилиш учун айёрлик қилган бўлиши мумкин.

Англия ва Германия лигаларидан фарқли ўлароқ, Франция чемпионатида диний сабабларга кўра ўйинда танаффус эълон қилинишига рухсат берилмайди.

«Гавр»га қарши ўйинда «Нант» 2:0 ҳисобида ғалаба қозонган.