Колумбия президенти Густаво Петро Эквадор президенти Даниэл Нобоани туҳматда айблаб, расман судга даъво аризаси киритди. Икки қўшни давлат раҳбарлари ўртасидаги муносабатлар кескинлашгани халқаро ҳамжамият эътиборида бўлиб турибди.

Зиддият Даниэл Нобоанинг баёнотидан кейин авж олди. У Колумбия етакчисини 2025 йилда Эквадорнинг Манта шаҳрига қилган ташрифи давомида ашаддий наркобарон «Фито» билан яширин алоқа ўрнатганликда айблаган эди. Густаво Петро бу иддаоларни қатъий рад этиб, буни ўзининг сиёсий обрўсига берилган «қасддан қилинган зарба» деб атади.

Қолаверса, Петро Эквадорнинг собиқ вице-президенти Хорхе Гласнинг озод этилишини талаб қилган эди. Унинг айтишича, Нобоа бу талабга нисбатан «ўта ҳурматсиз» муносабатда бўлган.

Колумбия президентининг таъкидлашича, ўша Мантага ташрифи чоғида унинг хавфсизлигини айнан Нобоанинг шахсий буйруғи билан Эквадор қуролли кучлари таъминлаган эди.

Ушбу суд даъвоси Лотин Америкаси икки давлати ўртасидаги дипломатик алоқаларни инқироз ёқасига келтириб қўйди. Кузатувчиларнинг фикрича, бу можаро минтақадаги хавфсизлик ва гиёҳвандликка қарши кураш соҳасидаги ҳамкорликка салбий таъсир кўрсатиши мумкин.