Президент Шавкат Мирзиёев тадбиркорлар билан VI очиқ мулоқотда бизнесга маъмурий босимни кескин камайтириш бўйича янги ташаббусларни маълум қилди. Бу йўналишда кичик бизнес фаолиятини текширишга уч йиллик мораторий жорий этилиши белгиланди.

Қайд этилишича, сўнгги уч йилда солиқ юки 13,4 фоиздан 12 фоизга, ўн йилда эса яширин иқтисодиёт улуши 50 фоиздан 26 фоизга тушган.

Президент иқтисодиётни «соя»дан чиқариш текширувлар орқали эмас, тадбиркорга йўл кўрсатиш ва тўғри ишлашни ўргатиш орқали амалга оширилиши кераклигини таъкидлади.

Таҳлил қилинган 5 минг тадбиркорнинг ярмидан кўпида бир йилда 2–3 марта, яна 21 фоизида 4 мартадан солиқ текшируви ўтказилган. Бунга бошқа назорат идораларининг такрорий текширувлари ҳам қўшилмоқда.

Янги тартибга кўра, кичик бизнес субъектларида инсон саломатлиги ва бошқа тадбиркорлар манфаатларига зарар етказиш билан боғлиқ бўлмаган ҳар қандай текширув учун уч йил муддатга мораторий эълон қилинади.

Президент тадбиркорликда барқарорлик ва хотиржамлик муҳимлигини қайд этди. Унинг таъкидлашича, хотиржамлик бўлмаган жойда эркинлик ҳам, ривожланиш ва янгиликка интилиш ҳам бўлмайди.

Шу билан бирга, ўрта ва йирик тадбиркорлар ўз корхонасини ихтиёрий профилактик аудитдан ўтказиши мумкин. Бундай аудит натижалари солиқ органлари томонидан тан олинади.

Камчиликларни профилактик аудит доирасида аниқлаб, уларни бартараф этган тадбиркор жаримага тортилмайди. Шунингдек, ўрта ва йирик тадбиркорда бир йил ичида такрорий текширув ўтказилишига ҳам чеклов қўйилади. Бундай текширув фақат Бизнес-омбудсман рухсати билан амалга оширилиши белгиланмоқда.