2024 йил октябридан 2025 йил сентябригача АҚШ чегара хизмати АҚШ-Мексика чегарасида 238 мингга яқин ноқонуний кесиб ўтишга уринишларни қайд этди.

Бу 1970 йилдан бери энг паст кўрсаткич бўлиб, ўшанда тахминан 202 минг шундай ҳодиса қайд этилган. Бу рақамларни CBC News АҚШ Ички хавфсизлик департаменти маълумотларига таяниб хабар қилмоқда. 

CBS News таъкидлаганидек, бу йилги кўрсаткичлар Жо Байден маъмурияти давридаги кўрсаткичлардан кескин фарқ қилади. 2022 йилда расмий чегара ўтиш жойларини четлаб ўтишга 2,2 миллион уриниш бўлган, бу тарихдаги энг юқори кўрсаткичдир. Охирги 12 ой ичида ноқонуний уринишларнинг аксарияти - 60 фоиздан ортиғи Байден маъмурияти даврида содир бўлган. 

Телеканалнинг Оқ уй матбуот котиби Абигайл Жексонга иқтибос келтиришича, президент Трамп “жанубий чегарамиз хавфсизлигини таъминлаш ҳақидаги ваъдасини тўлиқ бажармоқда” ва “Америкаликлар энди “ноқонуний мусофирлар ва хавфли гиёҳванд моддалар”дан хавфсиз. Айни пайтда, Миграция сиёсати институти таҳлилчиси Ариэл Руиз Сотонинг қайд этишича, ноқонуний кесиб ўтишлар камайиши 2024 йилнинг ёзида, Байден маъмурияти бошпана талабларини кучайтирган пайтда бошланган. Трамп маъмурияти, экспертнинг сўзларига кўра, бир неча ой ичида миграция оқимлари учун “янги норма”ни ўрнатган.