Нидерландиянинг Ассен шаҳридаги Дренте музейидан 2025 йилда ўғирлаб кетилган қадимий Руминия олтин дубулғаси топилди. The Guardian нашрининг ёзишича, ўғрилар ноёб экспонатни эритиб сотиб юборган бўлиши мумкин деган хавотирлар бор эди.

2,5 минг йиллик тарихга эга олтиндан ясалган дубулға ва учта билагузук ўтган йилнинг январ ойида ўғирланган эди. Ушбу экспонатлар Нидерландиядаги музейга «Дакия: олтин ва кумуш империяси» кўргазмаси учун вақтинча олиб келинганди.

Дренте музейи бош директори Гарри Тупан содир бўлган ўғриликни «қора кун» деб атади. Унинг сўзларига кўра, муассасанинг 170 йиллик тарихида бундай ҳолат ҳеч қачон кузатилмаган. Ушбу ҳодиса Руминия ва Нидерландия ўртасидаги муносабатларда кескинликни келтириб чиқарди, чунки дубулға Руминиянинг миллий хазинаси ҳисобланади.

2025 йилнинг сентябр ойида Руминия ўғирланган артефактлар учун 5,7 млн евро миқдорида товон пули олди. Агар экспонатлар топилса, мамлакат ушбу маблағни қайтариб бериши шартлиги белгилаб қўйилган эди.

Ассен полицияси ўғрилик содир этилганидан бир неча кун ўтиб гумонланувчиларни ҳибсга олган, бироқ улар дастлабки эшитувларда кўрсатма беришдан бош тортган. Терговчилар дубулғанинг қаердалигини очиқлагани эвазига гумонланувчилардан бирига қамоқ жазосини икки баравар қисқартиришни таклиф қилди. Бошқа бир шеригига эса хазина яширилган жой ҳақидаги маълумот учун 400 минг евро ваъда қилинди.

Орадан бир йилдан кўпроқ вақт ўтиб, олтин дубулға ва иккита билагузук топилди. Учинчи тақинчоқни қидириш ишлари давом этмоқда. Қайд этилишича, артефактларга кичик шикаст етган. Жиноятчилар устидан суд жараёни шу йилнинг апрел ойи охирида бошланади.