2026 йилнинг январ–феврал ойларида Ўзбекистонда 29,2 трлн сўмлик қурилиш ишлари бажарилди. Миллий статистика қўмитасига кўра, бу кўрсаткич ўтган йилнинг мос даврига нисбатан 10,6 фоизга ошган.

Қайд этилишича, қурилиш ишлари таркибида энг катта улуш — 70,2 фоиз бинолар ва иншоотлар қурилишига тўғри келган. Ушбу йўналишда 20,5 трлн сўмлик ишлар амалга оширилган.

Қолган қисмда фуқаролик объектлари қурилиши 5,5 трлн сўмни ташкил этган бўлса, ихтисослаштирилган қурилиш ишлари ҳажми 3,2 трлн сўмга тенг бўлган.

Фуқаролик объектлари қурилиши йўналишдаги 5,5 трлн сўмлик ҳажм иқтисодиётда инфратузилмавий лойиҳалар ҳам изчил давом этаётганини кўрсатади.

Маълумот учун, сўнгги йилларда қурилиш соҳасида барқарор ўсиш кузатилмоқда. Хусусан, 2022 йилда 12,7 трлн сўмлик ишлар бажарилган бўлса, 2023 йилда бу кўрсаткич 12,9 трлн сўмга етган. 2024 йилда ҳажм 16,2 трлн сўмгача ошган ва 2025 йилда кескин сакраб, 25,1 трлн сўмни ташкил этган. 2026 йилда эса бу рақам 29,2 трлн сўмга етди.