Xiaomi компанияси Appleнинг илк букланувчи iPhoneи тақдимоти арафасида янги букланувчи флагман смартфони — 18 Foldни намойиш этди. Компания янги қурилмани 7 сентябр куни, Apple тадбирига икки кун қолганда тақдим қилди. Айтиш жоизки, Xiaomi 18 Fold кенг форматдаги ички экрани билан ажралиб туради.

Смартфоннинг ташқи экрани 5,38 дюйм, ички экрани эса 7,38 дюйм диагоналга эга. Ҳар икки дисплейнинг томонлар нисбати 2:1 бўлиб, компания уни A4 қоғоз варағи форматига яқинлаштирган.

Xiaomiнинг таъкидлашича, бундай экран матн ўқиш ва видеолар томоша қилишда қулайлик яратади. Қурилма букланган ҳолатда оддий смартфон сифатида, очилганда эса кенг экранли қурилма сифатида ишлатилади.

Энг қизиғи, кенг форматда очиладиган букланувчи смартфонлар бозорида Xiaomiдан аввал Huawei ва Samsung каби компаниялар ҳам ўз моделларини аллақачон тақдим этишга улгурган эди.

Xiaomi 18 Foldнинг тақдимоти Appleнинг букланувчи iPhoneи ҳақидаги шов-шувлар янада кучайган бир пайтга тўғри келди. Энди эса технология ихлосмандлари Apple янги қурилмаси билан Xiaomiнинг янги букланувчи смартфони ўртасидаги фарқларни солиштириш имконига эга бўлишди.