Президент администрацияси раҳбари Саида Мирзиёева ота-оналарни болаларда жониворларга нисбатан меҳр уйғотишга чақирди ҳамда Ўзбекистонда ҳайвонларга шафқатсиз муносабатда бўлганлик учун жазо чоралари кучайтирилганини эслатди.

Таъкидланишича, жорий йилнинг 28 июнидан ҳайвонларга шафқатсиз муносабатда бўлганларга нисбатан янада кескин жазо чораларини назарда тутувчи қонунчилик нормалари кучга кирган.

Эндиликда бундай қилмишлар учун маъмурий жарималар икки баробар оширилди. Бундан ташқари, ҳуқуқбузарларга нисбатан 15 суткагача маъмурий қамоқ жазоси қўлланилиши мумкин. Бу турдаги ноқонуний хатти-ҳаракатларни содир этишда давом этган шахслар эса жиноий жавобгарликка тортилиб, озодликдан маҳрум қилиниши назарда тутилган.

Мирзиёеванинг таъкидлашича, бундай қонунлар айбдорларни жазолаш учунгина қабул қилинмайди. Улар жамият қандай тартиб ва қадриятларни ҳамма учун бирдек мажбурий деб ҳисоблашини ҳам намоён этади.

Унинг фикрича, барча зўравонликка муросасиз муносабатда бўлгандагина жамиятда хавфсизлик ҳукм суради.

«Аллоҳ яратган ҳар бир мавжудотнинг қадри бор, ҳайвонларга нисбатан шафқатсизлик учун жазонинг кучайтирилиши жамиятда шу қонуниятга бўйсунадиган соғлом муҳитни шакллантиришга хизмат қилади.

Биз айнан шундай дунёда яшашни ва фарзандларимизни худди шу руҳда вояга етказишни истаймиз. Ўзгалар ҳаётига ҳурмат болаликдан бошланади. Бу борада асосий масъулият ота-оналар зиммасида. Айнан улар ожизларга озор етказиш мумкин эмаслигини, одам ўз кучини шафқатсизлик орқали намоён этиши нотўғри эканини фарзандларига ўргатадилар. Мен ота-оналарни ушбу муҳим ҳақиқатни доимо эсда тутишга чақираман», — деди Администрация раҳбари.

Саида Мирзиёева видеода Администрациянинг кичик «ходимлари» — Ялпиз ва Дархон лақабли мушукларни кўрсатиб, уларга ходимларнинг меҳри бўлакча эканини айтиб ўтди.