Millionlab insonlar to‘rt yil davomida intizorlik bilan kutgan lahzalar yetib keldi. Sayyoramizning eng mashhur, eng shiddatli va nufuzli sport bayrami — futbol bo‘yicha 2026-yilgi Jahon chempionati rasman start oldi! Bu safargi mundial avvalgilaridan mutlaqo farq qiladi, chunki biz futbol tarixidagi yangi eraning guvohiga aylanib turibmiz.

AQSh, Kanada va Meksika yashil maydonlari mezbonlik qilayotgan ushbu turnir o‘zining keng ko‘lamliligi va iqtisodiy qudrati bilan rekordlarni allaqachon yangilab bo‘ldi.

FIFA Kengashi tomonidan JCh–2026 uchun ajratilgan rekord darajadagi 727 million dollarlik umumiy budjet va 655 million dollarlik sof sovrin jamg‘armasi turnirning naqadar ulkan ahamiyatga ega ekanidan dalolat beradi.

Maydonda nafaqat Jahon chempionligi oltin kubogi va bosh sovrin hisoblangan 50 million dollarlik rekord mukofot puli, balki o‘z vatani sharafini himoya qilayotgan eng kuchli terma jamoalarning bor umid va ishtiyoqi to‘qnashadi.

Jahon chempionatining finaligacha yetib borib, kumush medal bilan kifoyalangan ikkinchi finalchi esa 33 million dollar mukofot puliga ega chiqadi.

Shuningdek, kuchli uchlikni yakunlab, bronza medali sohibiga aylangan terma jamoa 29 million dollar ishlab topsa, musobaqada to‘rtinchi o‘rinni egallagan jamoa g‘aznasi 27 million dollarga boyiydi.

Bunday yirik moliyaviy rag‘bat nafaqat futbol nufuzini, balki maydondagi raqobatni ham yangi bosqichga olib chiqadi. 50 million dollarlik bosh sovrin istalgan mamlakat futboli rivoji uchun ulkan investitsiya bo‘la oladi.

​Yangi formatdagi turnirda hatto pley-offning ilk bosqichlariga chiqish ham jamoalar budjetini sezilarli darajada boyitadi. FIFA mukofotlarni bosqichlar kesimida juda jozibador tarzda taqsimlagan. Musobaqaning chorakfinal (1/4) bosqichigacha yetib kelgan omadli jamoalarga 19 million dollardan beriladi. Nimchorakfinal, ya’ni 1/8 final ishtirokchilari esa 15 million dollardan qo‘lga kiritishadi.

Pley-offning ilk dovoni — 1/16 finalga chiqqan terma jamoalarning har biriga 11 million dollardan ajratiladi. Hatto omadi chopmay, musobaqani guruh bosqichidayoq tark etadigan terma jamoalar ham quruq qo‘l bilan qaytishmaydi, ularga 9 million dollardan kafolatlangan mablag‘ beriladi.

​FIFA rahbariyati ushbu yirik turnirda ishtirok etuvchi har bir mamlakatning xarajatlarini qoplashni ham oldindan o‘ylab qo‘ygan. Budjetdan tashqari, JCh–2026ning har bir ishtirokchisiga yo‘l va tayyorgarlik jarayonlarini yuqori darajada tashkil etish uchun qo‘shimcha 1,5 million dollardan naqd pul mablag‘i ajratiladi.

Shubhasiz, JCh–2026 nafaqat maydondagi shiddatli o‘yinlari, balki sport iqtisodiyoti tarixidagi eng daromadli va muvaffaqiyatli loyiha sifatida ham yilnomalardan joy oladigan bo‘ldi.

Ilk bor 48 ta jamoa ishtirokida o‘tayotgan ushbu tarixiy mundialda har bir uchrashuv haqiqiy finalga aylanishi shubhasiz. Xo‘sh, futbol olamining yangi qiroli kim bo‘ladi?