Endi Byornem rasman Buyuk Britaniya bosh vaziri lavozimida ish boshladi. Bu haqda Sky News telekanali Bukingem saroyiga asoslanib xabar berdi.

«Qirol undan hukumatni shakllantirishni so‘radi, Byornem taklifni qabul qildi», — deyiladi xabarda.

Yangi bosh vazir (Endi Byornem) Toni Bler va Gordon Braun hukumatlarida turli lavozimlarda faoliyat yuritgan. U 2007–2010-yillarda G‘aznachilik bosh kotibi, Sog‘liqni saqlash vaziri, shuningdek Madaniyat, ommaviy axborot vositalari va sport vaziri bo‘lib ishlagan.

2017-yilda u Katta Manchester meri etib saylangan.

Byornem ham o‘zidan oldingi bosh vazir kabi Ukrainani qo‘llab-quvvatlaydi. May oyida, u hali Kir Starmerning asosiy raqibi sifatida ko‘rilayotgan vaqtda, Rossiyaga qarshi qaratilgan qator choralarni, xususan, Rossiya milliy terma jamoasining bir necha yil avval futbol bo‘yicha jahon chempionatidan chetlatilishini ma’qullagan edi. Shuningdek, u Britaniyadagi o‘ng qanot siyosiy kuchlarning Moskvaga yaqin deb baholanayotgan pozitsiyasini xavf sifatida baholagan.

Kir Starmer Buyuk Britaniya hukumatini qariyb ikki yil boshqardi. Uning davrida mamlakat iqtisodiy qiyinchiliklar, migratsiya siyosatiga qarshi namoyishlar hamda qator siyosiy mojarolarga duch keldi. Starmer Ukrainaning faol tarafdori bo‘lib, bu mamlakatga harbiy xizmatchilar yuborish rejasini ko‘rib chiqqan va Ukraina Qurolli kuchlariga bir necha milliard funtlik yordam ko‘rsatgan. May oyida bo‘lib o‘tgan mahalliy saylovlarda Leyboristlar partiyasi muvaffaqiyatsizlikka uchragach, partiyaning qariyb yuz nafar deputati uni iste’foga chiqishga chaqirgan edi.