GEROPHARM kompaniyasi O‘zbekiston Respublikasida semizlik va 2-turdagi qandli diabetni davolash uchun mo‘ljallangan innovatsion Sejaro® preparati (XPN — tirzepatid) uchun davlat ro‘yxatidan o‘tkazilganlik guvohnomasini oldi. Preparat Amerikaning Eli Lilly kompaniyasi tomonidan ishlab chiqarilgan, 2025 yilda dunyoda eng ko‘p sotilgan dori vositasiga aylangan original «Mounjaro» preparatiga to‘liq bioekvivalentdir.

Davlat ro‘yxatidan o‘tkazilganlik guvohnomasining olinishi Sejaro® preparatini O‘zbekiston bozoriga chiqarish hamda bemorlar uchun tirzepatid asosidagi semizlik va 2-turdagi qandli diabetni zamonaviy davolash usullaridan foydalanish imkoniyatlarini kengaytiradi.

Sejaro® preparatining faol moddasi — tirzepatid — ikki asosiy inkretin gormoni retseptorlarini faollashtiradi, ochlik hissini kamaytiradi, yuqori kaloriyali oziq-ovqatga bo‘lgan ishtiyoqni pasaytiradi, tana vaznining kamayishiga, visseral yog‘ to‘qimasi hajmining kamayishiga va bel aylanasining kichrayishiga yordam beradi.

Tibbiyot mutaxassislarining alohida e’tibori tirzepatidning visseral yog‘ to‘qimasiga ta’siri bilan bog‘liq. U organizm uchun eng xavfli yog‘ turlaridan biri bo‘lib, ichki a’zolar atrofida to‘planadi va 2-turdagi qandli diabet, arterial gipertenziya hamda yurak-qon tomir kasalliklari rivojlanish xavfini oshiradi.

Xalqaro klinik tadqiqotlar ma’lumotlariga ko‘ra, tirzepatidni qo‘llash qandli diabet kasalligi bo‘lmagan bemorlarda 72 hafta davomida tana vaznining 22,5% gacha kamayishiga hamda bel aylanasining o‘rtacha 14,6 sm ga kichrayishiga olib keldi.

O‘zbekistonda semizlikning keng tarqalganligini hisobga olgan holda, Sejaro® preparatining davlat ro‘yxatidan o‘tkazilishi ayniqsa dolzarbdir. Jahon sog‘liqni saqlash tashkiloti hamda O‘zbekiston Respublikasi Sanitariya-epidemiologik osoyishtalik va jamoat salomatligi qo‘mitasi ma’lumotlariga ko‘ra, mamlakat katta yoshli aholisining 64% ortiqcha tana vazniga ega, har beshinchi fuqaro esa semizlikdan aziyat chekadi. 1980 yildan buyon mamlakatda semizlikning tarqalish darajasi 36% ga oshgan bo‘lib, bu mintaqadagi eng yuqori o‘sish holatlaridan biridir. Semizlik surunkali kasallik bo‘lib, 2-turdagi qandli diabet, yurak-qon tomir hamda boshqa yuqumli bo‘lmagan kasalliklar rivojlanish xavfini sezilarli darajada oshiradi.

«Semizlik muammosi global epidemiya darajasiga yetdi va zamonaviy sog‘liqni saqlash tizimining asosiy muammolaridan biri bo‘lib qolmoqda. Biz Sejaro® kabi zamonaviy biotexnologik yechimlar bemorlar uchun samarali davolash imkoniyatlarini kengaytirish, ularning salomatligi va hayot sifatini yaxshilashga yordam berishiga, shuningdek, shifokorlar uchun semizlik va 2-turdagi qandli diabetni davolashda muhim vositaga aylanishiga ishonamiz», — dedi GEROPHARM kompaniyasi bosh direktori Pyotr Rodionov.

Preparat teri ostiga yuborish uchun mo‘ljallangan eritma bilan to‘ldirilgan shprits-ruchka shaklida ishlab chiqariladi va olti xil dozada taqdim etiladi: 2,5 mg, 5 mg, 7,5 mg, 10 mg, 12,5 mg va 15 mg. Preparat haftada bir marta qo‘llaniladi, dozani oshirish esa shifokor tavsiyasiga ko‘ra bosqichma-bosqich amalga oshiriladi.

Sejaro® retsept asosida beriladigan dori vositasidir. Davolashni belgilash to‘g‘risidagi qaror faqat tibbiyot mutaxassisi tomonidan tasdiqlangan ko‘rsatmalar hamda bemorning individual xususiyatlariga muvofiq qabul qilinadi.

Sejaro® preparatining ro‘yxatdan o‘tkazilishi GEROPHARM kompaniyasining O‘zbekistondagi dori vositalari portfelini yanada rivojlantirish yo‘lidagi muhim qadamdir. Avvalroq kompaniya semaglutid asosidagi “Semavis” va “Semavis Next” preparatlarini bozorga chiqargan bo‘lib, bugungi kunda ular o‘z segmentida yetakchi o‘rinlarni egallaydi. IQVIA ma’lumotlariga ko‘ra, 2025 yil aprelidan 2026 yil martigacha bo‘lgan davrda ushbu preparatlarning umumiy qiymatdagi ulushi 55,8 foizni tashkil etdi. FOM Group ma’lumotlariga ko‘ra, 2026 yil yanvar yakunlari bo‘yicha «Semavis» O‘zbekistonda dorixona savdolari bo‘yicha yetakchi o‘nta retsept asosida beriladigan dori vositalari qatoriga kirdi va sotuv hajmi bo‘yicha to‘qqizinchi o‘rinni egalladi. Bu esa metabolik kasalliklarni davolash uchun mo‘ljallangan zamonaviy preparatlarga bo‘lgan yuqori talabni tasdiqlaydi.

***

GEROPHARM — GxP standartlariga muvofiq faoliyat yurituvchi biotexnologik preparatlar ishlab chiqaruvchi xalqaro kompaniya. Kompaniya O‘zbekiston bozorida 20 yildan ortiq vaqt davomida faoliyat yuritib, mamlakat tibbiyot sohasi vakillari bilan hamkorlikni rivojlantirib kelmoqda. GEROPHARM preparatlari endokrinologiya, nevrologiya, oftalmologiya, ginekologiya va urologiya sohalarida qo‘llaniladi, kompaniya preparatlari esa dunyoning 15 ta mamlakatida taqdim etilgan.