AQSh prezidenti Donald Tramp ma’muriyati Oq uyda yangi bal zali va boshqa qurilish loyihalariga kamida 927 million dollar sarflashni rejalashtirmoqda, deb xabar berdi The Washington Post (WP) hujjatlar va manbalarga tayanib.

Gazeta bu miqdor avval taxmin qilinganidan ancha yuqori ekanligini va ish budjetdan moliyalashtirilishini ta’kidladi. WP buni «80 yil ichidagi eng qimmat Oq uyni ta’mirlash» deb baholamoqda.

Trampning Oq uydagi eng mashhur loyihasi - bu 900 o‘rinli yangi bal zali qurilishidir. Loyiha ko‘plab sud jarayonlari va nizolarga sabab bo‘lgan. O‘tgan hafta yana bir AQSh sudi Kongress uni davom ettrish yoki to‘xtatish to‘g‘risida qaror qabul qilmaguncha ushbu qurilish rejalarini to‘xtatib qo‘ydi.

Boshqa loyihalar qatoriga Oq uy yonidagi Lafayet maydonini rekonstruksiya qilish, vertolyot maydonchasi yaratish va yangi tashrif buyuruvchilar xavfsizligi markazi kiradi.

WP xabar berishicha, janob Tramp ma’muriyati ushbu qurilishning katta qismi uchun budjetni Kongressdan tasdiqlashni so‘ramagan, chunki u shunday qilishi kerak edi. Buning o‘rniga, u davlat idoralari va xususiy investorlardan pul yig‘di, keyin uni maxsus shu maqsadda yaratilgan departament tomonidan boshqariladigan maxsus hisobga o‘tkazdi. Oq uy ma’lumotlariga ko‘ra, ushbu hisobga Maxfiy xizmat kabi turli idoralar tomonidan kamida 500 million dollar va xususiy donorlar tomonidan kamida 305 million dollar kiritilgan. Bu Trampning loyihalari uchun mablag‘lar asosan xususiy shaxslar va tashkilotlardan kelishi haqidagi avvalgi bayonotlariga zid keladi.