O‘zbekiston raqamli texnologiyalar sohasida navbatdagi yirik qadamni tashladi. Hukumat mamlakat sun’iy intellekt ekotizimini institutsional darajada qo‘llab-quvvatlashga qaratilgan eng yirik davlat mexanizmini ishga tushirdi. Vazirlar Mahkamasining 2026-yil 5-iyundagi 288-sonli qarori bilan «President AI Award» tanlovini yangilangan nizomi rasman tasdiqlandi.

Ushbu tashabbus 2025-yil 22-oktyabrdagi PF-189-sonli Prezident Farmoni ijrosini ta’minlash maqsadida joriy etilgan bo‘lib, u avvalgi «President Tech Award» formatini almashtirmaydi. Aksincha, u sun’iy intellekt texnologiyalariga ixtisoslashgan mustaqil va kuchli loyiha sifatida to‘ldiradi.

Arizalar rasmiy awards.gov.uz portali orqali qabul qilinadigan ushbu global tanlov har yili 5 ta asosiy yo‘nalish bo‘yicha va 3 ta muhim toifada o‘tkaziladi:

 1. «Eng yaxshi startap» — Mutlaq g‘oliblar uchun 200 000 dollar

Ushbu yo‘nalishda g‘olib bo‘lgan kuchli uchlik «IT Park Ventures» MChJ tomonidan kompaniyadagi ulush evaziga quyidagi yirik investitsiya mablag‘lariga ega bo‘ladi:

   1-o‘rin: 100 000 dollar

   2-o‘rin: 60 000 dollar

   3-o‘rin: 40 000 dollar

Moliyalashtirish shaffoflik tamoyillari asosida, ikki bosqichda amalga oshiriladi. Mablag‘ning dastlabki 50 foizi shartnoma imzolangandan so‘ng 15 ish kuni ichida o‘tkazilsa, qolgan qismi bir yil davomida belgilangan KPI ijrosiga qarab taqdim etiladi.

 2. «Inkubatsiya» dasturi

Mazkur yo‘nalish doirasida saralab olingan 25 ta istiqbolli jamoaga o‘z g‘oyalarini rivojlantirishi uchun grant sifatida jami 1 000 000 dollar mablag‘ ajratiladi.

 3. «Akseleratsiya» dasturi

Bozorda o‘z o‘rnini topishga ulgurgan va kengayish bosqichidagi 15 ta jamoa uchun «IT Park Ventures» tomonidan jami 1 500 000 dollar miqdorida to‘g‘ridan-to‘g‘ri investitsiya kiritiladi.

Tanlov jarayonlari kechikishlarsiz, aniq belgilangan kalendar reja asosida tashkil etiladi:

1-iyulda tanlovga rasman start beriladi va e’lonlar joylashtiriladi;

Iyul-avgust oylarida portal orqali onlayn arizalar qabul qilinadi;

5-sentyabrgacha loyihalarning dastlabki taqdimoti bo‘lib o‘tadi;

1-dekabrga qadar saralangan jamoalar uchun maxsus akseleratsiya dasturi tashkil etiladi.

25-dekabrgacha esa eng kuchli loyihalarning yakuniy himoyasi bo‘lib o‘tadi.

Har bir yo‘nalishdan 5 tadan, jami 25 ta jamoa uchinchi bosqichga yo‘llanma oladi. Yakuniy final bosqichida esa mamlakatning eng kuchli 15 ta sun’iy intellekt loyihasi (g‘oliblar) aniqlanadi.

«President AI Award» tanlovida ishtirok etish mutlaqo bepul bo‘lib, hech qanday to‘lov undirilmaydi. Tanlovda O‘zbekiston fuqarolari bilan bir qatorda, mamlakatimizda doimiy yashovchi xorijlik mutaxassislar ham qatnashishi mumkin.

«Eng yaxshi startap» va «Akseleratsiya» yo‘nalishlari uchun 3 nafardan 8 nafargacha a’zo ishtirok etishi mumkin.

Bir jamoa faqatgina bitta yo‘nalish bo‘yicha loyiha taqdim eta oladi. Loyihalarga yo‘l-yo‘riq ko‘rsatuvchi mentorlar jamoaning asosiy tarkibiga kiritilmaydi.

Loyihalarning texnik baholanishi va qat’iy saralanishi esa bevosita IT Park tomonidan amalga oshiriladi. Bunda asosiy e’tibor startapning bozorga moslashuvchanligi, daromad keltirish modeli (monetizatsiya) hamda mamlakat uchun ijtimoiy-iqtisodiy foydasiga qaratiladi.

«President AI Award» — bu shunchaki pul mukofoti emas. Bu O‘zbekiston va xorijlik iste’dodlar uchun o‘z intellektual mahsulotlarini davlat miqyosida sinab ko‘rish va jahonning eng yirik xalqaro akselerator tarmoqlariga chiqish uchun berilgan eksklyuziv imkoniyatdir. O‘z loyihangiz bilan mintaqaviy sun’iy intellekt inqilobining bir qismiga aylaning!