Janubiy Koreyada Apellyasiya sudi sobiq prezident Yun Sok Yolning 2024-yil oxirida harbiy holat joriy etishga urinishi bo‘yicha qamoq jazosini yetti yilgacha oshirdi. Yonhap axborot agentligi xabar berishicha, maxsus prokuror Cho Eun Suk 10 yillik qamoq jazosini so‘ragan edi. 

Yanvar oyi o‘rtalarida sobiq prezident 2025-yilda tergovchilarning uni hibsga olishiga to‘sqinlik qilganlikda aybdor deb topildi. O‘sha paytda Yun Sok Yol harbiy holat joriy etish orqali to‘ntarishni uyushtirishda gumon qilingan edi.

U bu jinoyat uchun besh yilga ozodlikdan mahrum qilingan, ammo o‘shandan beri hukm ustidan apellyasiya shikoyati berdi. 

19-fevral kuni Seul markaziy okrug sudi Yun Sok Yolni 2024- yil 3-dekabrda asossiz ravishda harbiy holat e’lon qilganlikda aybdor deb topdi, sud buni Milliy Assambleya ishiga putur yetkazish uchun to‘ntarishni uyushtirishga urinish sifatida baholadi. Sud qaroriga ko‘ra, u shaxsan to‘ntarishni rejalashtirgan va yetakchi rol o‘ynagan, bu esa ulkan ijtimoiy xarajatlarga olib kelgan.

Sobiq prezident harbiy holat joriy etishni oqlash va siyosiy raqiblarni yo‘q qilish uchun Shimoliy Koreyani harbiy tajovuzga undashga urinishda aybdor deb topildi. Prokurorlar o‘lim jazosini so‘rashdi, ammo sud umrbod qamoq jazosini tanladi. U shuningdek, hukm ustidan apellyasiya shikoyati berdi.