Путин Трампнинг Нобел ололмагани ҳақида гапирди

Нобел қўмитаси ўз обрўсини йўқотмоқда, Трамп эса инқирозларни ҳал қилиш учун кўп иш қиляпти, дея фикр билдирди Россия президенти Владимир Путин.
Нобел қўмитаси “тинчлик учун ҳеч нарса қилмаганларга бир неча бор Тинчлик мукофотини бергани” сабабли совриннинг нуфузи “катта даражада йўқолган”, деди Владимир Путин Душанбедаги матбуот анжуманида.
“Трамп тинчлик бўйича Нобел мукофотига лойиқми ёки йўқлигини билмайман, лекин у мураккаб инқирозларни ҳал қилиш учун кўп иш қилди”, — деди Путин ва АҚШ президентининг тинчлик ўрнатиш ташаббусларини олқишлаб.
Жума куни эрталаб Венесуэла мухолифати етакчиси Мария Корина Мачадо тинчлик бўйича Нобел мукофотини олгани эълон қилинди. Трамп етти урушни тўхтатгани учун ўзини нуфузли мукофотга лойиқ деб билишини ва уни бошқа бировга бериш “Американи ҳақорат қилиш” бўлишини бир неча бор таъкидлаган. Шу ҳафтада у ўзининг “Трамп режаси”ни амалга ошириш доирасида ҲАМАС ва Исроил ўртасида гаровга олиш ва ўт очишни тўхтатиш бўйича келишувга эришилганини эълон қилди.
Аввалроқ Оқ уй матбуот котиби Стивен Чанг Нобел қўмитаси қарорини сиёсий деб атаган ва Трамп сулҳ тузиш, урушларни тугатиш ва ҳаётни сақлаб қолишда давом этишини таъкидлаган эди.
Трампнинг ўзи эса мукофотнинг Мачадога берилишига ҳозирча изоҳ бермади.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter