Россиянинг Вологда вилоятида маҳаллий ҳукумат ичкиликбозликка қарши курашнинг янги босқичига ўтди. Янги қонунга кўра, вилоятдаги ихтисослашган барча спиртли ичимликлар дўконлари ўз фаолиятини тўхтатди. 

Вилоят губернатори Георгий Филимонов томонидан киритилган чекловлар ичимлик савдосида катта ўзгаришларга сабаб бўлди. 

Энди спиртли ичимликларни сотиш фақат кундузи соат 12:00 дан 14:00 гача (кунига 2 соат) мумкин. Дам олиш ва байрам кунлари савдо одатдаги тартибда давом этади, лекин фақат оддий озиқ-овқат дўконларида ичкилик сотилади.

Илгари фақат алкогол маҳсулотлари билан савдо қилган тармоқ дўконлари («Бристол», «Красное & Белое» ва бошқалар) учун кунига 2 соат ишлаш иқтисодий жиҳатдан фойда келтирмайди. Натижада, улар вилоятдаги фаолиятини тўхтатишга ёки бошқа турдаги маҳсулотларга ўтишга мажбур бўлди. 

Шунингдек, ичкилик сотиладиган ресторанларга оддий овқатланиш шохобчаларига  айланиши учун субсидиялар берилади. 

Губернаторнинг сўзларига кўра, Вологда вилояти ичкиликбозлик билан боғлиқ касалликлар ва ўлим кўрсаткичи бўйича Россияда юқори ўринларда турган. Ушбу «қаттиқ қўл» сиёсати орқали ёшлар ўртасида ичкиликбозликни камайтириш, иш унумдорлигини ошириш, оилавий ажримлар ва кўчадаги жиноятчиликни камайтириш кўзланган.